Елдер раскажува за полни автобуси повредени деца што дури сега пристигнуваат во болниците.
„Мириса на гнило месо… деца со страшни изгореници, со лузни од војна, рани од артилерија“, вели Елдер.
Во петокот почна четиридневниот прекин на огнот меѓу Израел и Хамас, за време на кој палестинските милитанти почнаа да ослободуваат заложници. Хамас е означен како терористичка организација во САД, ЕУ и некои други земји.
Според Елдер, луѓето во Газа го користат прекинот на огнот за да ги бараат своите семејства и да помагаат. Но вели дека само четири дена примирје, до вторник, нема многу да помогнат.
„Не можеме со чиста совест да се вратиме во ситуација кога дневно се убиваат по сто деца. Оваа пауза мора да се претвори во траен прекин на огнот, мора да му се вратиме на мирот“, додава Елдер за Дојче веле.
Во неделата во Израел пристигнаа уште тринаесет израелски и четворица тајландски државјани што Хамас ги држеше како заложници. Доцна во саботата Хамас му ги предаде на Црвениот крст на преминот Рафа, кој ја поврзува Газа со Египет.
Меѓу ослободените Израелци има шест жени и седум деца. Најмладата е тригодишната Јахел Шохам, ослободена со нејзината мајка и брат – додека нејзиниот татко сѐ уште е во рацете на Хамас.
За возврат, Израел ослободи шест Палестинки и 33 деца од своите затвори. Некои од нив беа пречекани од илјадници луѓе на Западниот Брег.
Меѓу нив беше и Нурхан Авад, која како 17-годишна девојка во 2016 година беше осудена на 13,5 години затвор бидејќи наводно се обидела да избоде израелски војник со ножици.
Според палестинските активисти, Израел држи 7.200 Палестинци во затвори, од кои околу 2.000 се уапсени од почетокот на конфликтот.
Во саботата, дури и краткото примирје се чинеше дека е загрозено бидејќи Хамас тврдеше дека Израел ја попречува испораката на хуманитарна помош во северниот дел на Појасот Газа.
Договорот со посредство на Катар и Египет, освен четири дена без борби, значи дека Хамас ќе ослободи 50 жени и деца, а Израел 150.
Тоа е првиот знак за смирување на тензиите по „црниот шабат“, како што Израелците го нарекуваат 7 октомври, кога Хамас уби околу 1.200 Израелци и зеде околу 240 заложници во масовни терористички напади.
Израел одговори со масовно бомбардирање на малиот Појас Газа и копнена интервенција. Според Министерството за здравство на Хамас во Газа, загинале речиси 15.000 луѓе, од кои две петтини биле деца.
Во Газа, многу места, станбени блокови и болници се срамнети со земја, додека Израел тврди дека се бори со Хамас, кој има мрежа од тунели, складишта за оружје и командни центри под градовите и болниците.
Сепак, иако во моментов нема пукање во Газа, само од сабота до недела, израелските сили убиле шест Палестинци на Западниот Брег, пренесува Ројтерс. Петмина од нив беа убиени во Џенин, каде што израелските сили вршеа рација, наводно, во потрага по осомничен за претходниот бомбашки напад.
Над 230 Палестинци беа убиени на окупираниот Западен Брег. Убијците често се радикални еврејски доселеници, и тоа пред очите на израелските сили.
Еден од посредниците, Катар, се надева дека примирјето може да биде продолжено. Така, преговорите за ослободување на другите заложници би можеле да продолжат, изјави портпаролот на катарското Министерство за надворешни работи за Си-ен-ен.
Израел најави дека примирјето може да биде продолжувано за еден ден на секои десет заложници ослободени од Хамас, но дека тие потоа ќе им се вратат на борбените операции.
Раководството на Израел е под притисок и од протести дома. Во саботата неколку илјади луѓе повторно се собраа во Тел Авив, барајќи приоритет на владата на Бенјамин Нетанјаху да биде ослободување на заложниците.
Како што пренесува Асошиејтед прес, притисокот од семејствата на заложниците и гневот поради неможноста на Израел да го спречи нападот на 7 октомври ја влошуваат дилемата со која се соочува политичката елита.
Десничарската влада на Нетанјаху како подеднакво важни приоритети ги прогласи елиминацијата на военото крило на Хамас и ослободувањето на заложниците.
