Четириесет и петгодишната Хернандо, која тешко наоѓа работа во баровите и рестораните, рече дека не може да си ги дозволи цените на киријата, кои значително се зголемија делумно поради брзиот развој на туризмот на шпанскиот остров.
„Цените растат, кириите растат, сè расте освен платите“, вели Хернандо.
Таа е една од многуте жители на Мајорка што почнаа да живеат во приколки паркирани во привремени кампови поради превисоките цени на становите и сопствениците што претпочитаат да им ги изнајмуваат на туристи.
Овој тренд предизвика протести на островот, како и во најпосетуваниот шпански град Барселона и на други места. Минатата недела околу 10.000 демонстранти учествуваа на митинг против масовниот туризам во Палма де Мајорка.
Во градот има три такви локации со кампери. Локалните власти обезбедија систем за рециклирање, но жителите велат дека на островот има само едно место за отстранување на отпадната вода. Тврдат дека не смеат да ги отвораат прозорците или да поставуваат маси надвор бидејќи се паркирани на јавни површини.
Полицијата им се заканува со парични казни, а локалната самоуправа тврди дека не може да им обезбеди дополнителни услови и ги пренасочува кај социјалните служби, велат камперите.
Антитуристичките активисти во Шпанија велат дека посетителите ја зголемуваат цената на сместувањето, поради што жителите не можат да си дозволат да живеат во центрите на градовите.
До мај Шпанија ја посетиле 33 милиони меѓународни туристи, што е за 14 отсто повеќе во споредба со истиот период во 2023 година.
Минатата година по Каталонија, Балеарските Острови беа најпопуларната шпанска провинција за туристи, со 14,4 милиони посетители, соопшти шпанскиот завод за статистика. Туризмот, исто така, учествува со 45 отсто од БДП на островот, соопшти здружението за туристичка индустрија Ексцелтур.
Посетителите сè повеќе претпочитаат да изнајмуваат викендички на апликациите како Ербиенби, при што краткорочните изнајмувања од странски туристи се зголемиле за 24 отсто меѓу март и мај, објави Ексцелтур.
Кириите на островите пораснале за 158 отсто во изминатата деценија, што е најостро зголемување во Шпанија, според веб-страницата Фотокаса.
Просечната кирија за стан од 80 квадратни метри на шпанскиот архипелаг во јуни изнесувала 1.447 евра, објави Фотокаса. Просечната плата во Шпанија е 1.925 евра, според заводот за статистика.
Четириесет и осумгодишната Аина Анамарија зела кредит за да купи кампер, за кој плаќа месечна рата од 323 евра, што е околу половина од платата од 700 евра што ја зема за работата во продавница. Изнајмувањето соба во стан на островот обично чини меѓу 400 и 500 евра, вели таа.
„Немам идеја како да живеам вака на мојот сопствен остров“, додава таа.
