Додека јавната поддршка на американската влада за Украина е „непоколеблива“, официјалните лица приватно изразија стравување дека Белата куќа може да биде фатена во бараж од критики доколку нападот не ги исполни очекувањата.
„Јастребите“ би можеле да критикуваат дека САД и сојузниците не ѝ дале доволно оружје и муниција на Украина, додека „гулабите“ ќе го гледаат тоа како доказ дека Киев не може да победи.
„Ако Украина не може драматично да добие на бојното поле, неизбежно се поставува прашањето дали е време да се преговара за прекин на непријателствата“, изјави за „Политико“ Ричард Хас, претседател на Советот за надворешни односи. „Скапо е, ни снемува муниција, мораме да се подготвиме за други непредвидени ситуации низ светот“.
Официјален претставник, кој побара анонимност, рече дека САД „префрлиле“ оружје и опрема во Украина и „речиси завршиле“ сѐ што побарал Киев. Но, зад затворени врати, САД се „загрижени за тоа што може да го постигне Украина“.
Американската војска верува дека конфликтот е заглавен во рововска војна, при што ниту едната страна не може да напредува многу далеку или многу брзо.
„Политико“ претходно објави дека Украина има 100.000 убиени војници, но подоцна ја промени таа информација наведувајќи дека тоа се однесува на вкупниот број жртви, вклучително и ранетите.
Весникот исто така наведува дека низ силите на Киев поминале „историски количини муниција и оружје“ и дека „дури и огромната сила на Западот“ не можела да ги задоволи нивните потреби.
Пентагон сега се сомнева дека Украина може да ја постигне својата цел да стигне до Крим, иако американската војска и понатаму се надева дека може да ги „наруши“ руските линии на снабдување.
Прекинот на огнот ќе биде претставен пред западната и украинската јавност како привремен прекин на огнот, „оставајќи ја вратата отворена за Украина да поврати повеќе од својата територија во иднина“, изјавија некои американски претставници за Политико.
Тоа беше направено и претходно, кога во 2015 година беа потпишани договорите од Минск, кои според признанијата на Франсоа Оланд и Ангела Меркел служеа за купување на време и нивно вооружување.
