Период на интензивна топлина го зафаќа континентот. Би-би-си вели дека топлинскиот бран во јужна Европа ќе се интензивира во текот на следните неколку дена, а температурите ќе го достигнат врвот в среда.
Милиони луѓе се борат со екстремните временски услови, вели Би-би-си.
Топлинските бранови ја зафаќаат јужна Европа, делови од САД и Кина – а екстремни горештини има и во Јапонија.
Топлинскиот бран што го зафати Медитеранот би можел да продолжи и во август, според агенцијата Светска метеоролошка организација (СМО) на ОН.
Температурите во делови од Европа се на 40-тина степени и може дополнително да се зголемат, а топлото време ќе го достигне врвот в среда.
Во Грција над 40
Неколку шумски пожари избувнаа во Грција, поради што 1.200 деца беа евакуирани од летните кампови, а селаните бегаат, вели Би-би-си. Во Грција температурите достигнаа 40 Целзиусови степени, а во некои области и повеќе.
Грчкиот премиер Киријакос Мицотакис, кој во моментов е во Брисел на самит, вели дека властите прават сѐ што е можно да помогнат.
„Денес беше првиот суштински тежок ден од ова лето“, рече тој.
„Без сомнение ќе следат уште. Пожарите се појавија и ќе продолжат да се појавуваат.“
Тој додава: „Предизвикот е како да ги скротиме што е можно побрзо, така што штетата што ја трпиме да биде што е можно поограничена“.
Шумски пожари има и на шпанскиот остров Ла Палма.
Кина привремено ја забележа највисоката температура досега во северозападниот регион Синџијанг.
Кинеската метеоролошка управа соопшти дека во неделата живата достигнала температура од 52,2 Целзиусови степени во селото Санбао.
Во меѓувреме, југозападниот дел на САД, исто така, се соочува со екстремна топлина, при што експертите ја истакнуваат должината на топлинскиот бран, како и неговиот интензитет.
Ел Пасо, Тексас, се соочува со температури над 38 Целзиусови степени 32 последователни дена – надминувајќи го претходниот рекорд од 26 дена.
Поплави погодија и делови од САД, додека десетици луѓе загинаа во поплавите во Јужна Кореја.
СМО вели дека таквото екстремно време е „сè почеста појава во нашата затоплувачка клима“ и ја нагласува потребата да се намалат емисиите на стакленички гасови, кои ги предизвикуваат климатските промени.
Европа достигна речиси 45 Целзиусови степени во понеделникот
Највисоката температура во Европа во понеделникот беше во јужна Шпанија – каде што Андухар достигна 44,8 Целзиусови степени.
Сицилија не заостануваше многу, со 43,5 Целзиусови степени.
И други земји, меѓу кои Италија, Грција и Турција, исто така достигнаа над 40 Целзиусови степени, така што топлината е широко распространета, вели Би-би-си.
Прогнозите се дека тоа ќе продолжи во поголем дел од оваа недела, а на некои места се очекува да има уште повисоки температури во текот на следните неколку дена. Метеоролошката агенција на ОН, Светската метеоролошка организација, вели дека горештините ќе се засилат до среда во делови од Медитеранот, вклучувајќи ги Турција и Грција.
Ноќите исто така ќе бидат екстремно топли.
Како топлинските бранови се поврзани со климатските промени
Екстремните временски услови стануваат сѐ почести и поинтензивни на многу места поради климатските промени, вели Би-би-си.
Дури и малото зголемување на просечните температури прави голема разлика.
Тоа е затоа што целата распореденост на дневните температури се поместува на потопли нивоа, што ги прави жешките денови поверојатни и поекстремни.
Научниците користат компјутерски симулации за да проценат дали екстремните временски настани се поверојатни поради загревањето предизвикано од луѓето.
На пример, рекордниот топлински бран низ Шпанија, Португалија и северозападна Африка во април беше најмалку 100 пати поверојатен поради климатските промени, според Светската климатска мрежа (ВВА).
Топлинските бранови исто така стануваат подолги и поинтензивни.
Ова може да се случи преку „топлински куполи“ – области со висок притисок каде што топлиот воздух е потиснат надолу и е заробен на едно место, предизвикувајќи зголемување на температурите на големи површини.
Една теорија вели дека повисоките температури на Арктикот – кои се загреале повеќе од четири пати побрзо од глобалниот просек – предизвикуваат силните ветрови наречени млазни текови да забават и ја зголемуваат веројатноста за топлински куполи.
Какви температури се предвидуваат?
Јужна Сардинија може да забележи температури од 46 Целзиусови степени, а на југот на италијанското копно се прогнозираат максимални температури од 43 Целзиусови степени.
Југот на Шпанија, исто така, може да забележи максимални температури од 46 Целзиусови степени, додека јужна Франција ќе достигне 37 Целзиусови степени, според најновите прогнози.
Исто така, има предупредувања за екстремна топлина за југозападниот дел на САД, при што температурните рекорди веројатно се срушени во 38 града.
Температурите во неделата достигнаа 46,6 Целзиусови степени во Лас Вегас, Невада, според Националната метеоролошка служба (НВС) и може да достигнат и до 45 Целзиусови степени подоцна оваа недела.
Во Феникс, Аризона, НВС соопшти дека имало максимални температури од 46,1 Целзиусови степени во неделата со потенцијални рекордни максимални температури од 47,2 Целзиусови степени оваа недела.
Што е топлински бран?
Топлинскиот бран е период на топло време каде што температурите се повисоки од очекуваните за одреден период од годината.
Експертите велат дека периодите на исклучително топло време стануваат сѐ почести и климатските промени значат дека сега е нормално да се доживуваат рекордни температури.
Европскиот центар за временски прогнози со среден опсег соопшти дека на глобално ниво, овој јуни бил најтоплиот досега.
Топлинскиот бран што ја погоди јужна Европа оваа недела го доби името Харон, по митолошкиот лаѓар што ги превезува душите во подземниот свет.
Илјадници евакуирани поради шумски пожари во Шпанија
Најмалку 4.000 луѓе се евакуирани од домовите на шпанскиот остров Ла Палма, додека пожарникарите работат на локализирање на шумскиот пожар што излезе од контрола.
Жителите на селото Пунтагорда и соседното Тијарафе мораше да бидат евакуирани.
Пожарот зафати повеќе од 4.650 хектари и уништи најмалку 20 дома, соопштија властите.
„Нашите лета сега се врели“
Џулио Бети, италијански метеоролог и експерт за клима, предупредува дека летните горештини низ Европа станале „ненормални“.
„Топлинските бранови навистина се случуваа и во 1960-тите, но тоа беа епизоди, кои траеја можеби неколку дена во летото, често во средината на летата, кои може да бидат или топли, или студени и дождливи“, вели Бети.
„Но ние дури не се ни сеќаваме какви беа ‘пријатните’ лета. Во Италија, ние имаме перцепција дека оваа година месецот јуни беше пријатен и свеж, додека тој всушност беше 11-тиот најтопол јуни од почетокот на евиденцијата во 19 век.“
„Она што се смени е нашата перцепција и треба да бидеме многу загрижени дека повеќе нема да имаме наизменично свежи и топли лета; сите тие се врели и постојано стануваат сѐ поврели.“
„Нормалните лета сега се реткост и ова е глобален проблем што не познава граници“.
Симптоми на топлински удар и топлинска исцрпеност
Премногу високите температури може да предизвикаат и топлинска исцрпеност и топлински удар. Двете појави се различни, но првата ѝ е претходник на втората. Како знаци на топлинска исцрпеност, еве на што треба да внимавате:
Чувство на несвестица или вртоглавица
Прекумерно потење
Леплива кожа
Гадење или повраќање
Мускулни грчеви
Од друга страна, ако вие или некој во ваша близина страдате од топлински удар, симптомите се:
Конфузија
Отсуство на потење
Температура над 40Ц со топла, сува кожа
Гадење или повраќање
Губење на свеста, грчеви или напади.
„Многу страшно е да се гледаат климатските промени на дело“
Експертка за климатски промени од Универзитетот во Рединг вели дека за неа е „многу страшно“ да ги гледа реалните влијанија на климатските промени во сегашниов топлински бран.
Професорката Хана Клоук вели дека се проценува дека минатото лето повеќе од 61.000 луѓе умреле поради топлина, а ова е слична ситуација. „Ова ќе биде смртоносно“, вели таа.
Подолгите и поопасни топлински бранови одговараат на она што го предвидуваат климатските модели, а таа со години предупредува за овие влијанија.
„Тоа е неверојатно фрустрирачко – се чини дека никој од влијателните не слуша, без разлика колку силно викате или колку од петни жили се трудите“, вели таа.
Европа се загрева побрзо отколку што предвидуваа многу климатски модели, објаснува таа, додавајќи дека науката е исклучително комплицирана.
„Постои чувство дека тоа излегува од контрола. Нѐ чека многу работа за да утврдиме што точно се случува“, вели таа.
Рекордни температури и на океаните
Кога размислуваме за тоа колку е топло, имаме тенденција да размислуваме за температурата на воздухот, бидејќи тоа е она што го доживуваме во секојдневниот живот, вели Би-би-си.
Но најголем дел од топлината складирана во близина на површината на Земјата не е во атмосферата, туку во океаните. А оваа пролет и лето имаме рекордни температури на океаните.
Северен Атлантик, на пример, моментално ги доживува највисоките температури на површинските води што некогаш биле забележани.
Во исто време, во тропскиот Пацифик се развива Ел Нињо.
Со оглед на тоа што и Атлантикот и Пацификот се соочуваат со топлински бранови, можеби не е изненадувачки што глобалните температури на површината на морето и во април и во мај беа највисоките досега забележани во податоците што датираат до 1850 година.
Колку долго ќе траат овие топлински бранови?
Европа: Врвот на топлината најверојатно го погодува централен Медитеран денеска, веројатно ќе достигне 46 Целзиусови степени на Сардинија. Светската метеоролошка организација соопшти дека топлинскиот бран најверојатно ќе продолжи и во август.
Северна Америка: Исклучително опасен топлински бран ќе продолжи во југозападниот дел и следната недела. Според Националната метеоролошка служба, се очекуваат опасни горештини низ југозападот најмалку до 28 јули.
Кина: Температурите во Пекинг се прогнозираат до високи 30 до почетокот на викендот, кога дождот ќе овозможи одмор од врелината.
Што значат 40 Ц за вашето тело?
Застанете малку и размислете што значат 40 Целзиусови степени за метаболизмот на вашето тело. Нашата природна телесна температура е 37 Ц. Нашите системи имаат тенденција да почнат да се „исклучуваат“ ако станеме многу постудени или многу потопли од тоа. Така, нашите тела се борат да нѐ задржат на 37 Целзиусови степени.
Кога ќе влеземе над 40-тиот степен, тоа е вистинска борба. Кога размислуваме за тоа колку се чувствуваме уморно на топлина, тоа е вистински замор, бидејќи нашето тело работи многу напорно за да се обиде да ја ублажи нашата температура.
Ова е навистина опасно време за милиони луѓе низ цела Европа, бидејќи тие се изложуваат на овие навистина исцрпувачки температури.
