Доколку Македонија беше според перцепција за корупција во првите 30 во светот, а не во првите 100 како што е во моментот, верувајте многу поразлично ќе изгледаше проблемот со нашиот сосед Бугарија, нагласи Николоски.
Корупцијата, нагласи, ја има од најниско до највисоко ниво, од шалтерски работник до премиер, забележувајќи дека граѓаните се иселуваат поради немање ред и поредок во државата.
Николоски рече дека неколку влади во Македонија ги губеле изборите поради случаи на прислушување, па нагласи дека сегашната влада дојде обвинувајќи дека се прислушувало во државата, но таа, како што нагласи, ветувајќи дека нема да има прислушување, продолжила со таква пракса.
Според потпретседателот на ВМРО-ДПМНЕ, ако некогаш се следела телефонска комуникација и СМС пораки, сега се врши следење со таканаречени малициозни софтвери кои што директно влегуваат во апаратот на оној кој што треба да биде следен.
Тој нагласи дека ако Македонија не се обврзе да не врши следење од таков тип, дека тоа ќе го стори идната влада на ВМРО-ДПМНЕ, па најави:
„Ексклузивно да соопштам, оваа среда, точно на 11 октомври во Стразбур, Парламентарното собрание на Советот на Европа ќе води голема дебата за злоупотреба на системите Предатори и Пегасус со кои што, мислам, и во Македонија се прислушува. Јас ќе бидам еден од говорниците, а после тоа ќе се усвои Резолуција која што ќе стане обврзна за Македонија. И доколку овие не ја спроведат, а нема да ја спроведат, ќе ја спроведеме ние и ќе одговараат сите кои што прислушувале“, заклучи Николоски.
