„САД можат да бидат безбедни само ако Азија е безбедна и затоа долго го одржуваат своето присуство во овој регион“, кажа Остин на Шангри ла дијалогот, годишната конференција за одбрана која трае до недела која во последните години стана барометар за кинеско-американските односи.
Тој додаде дека и покрај конфликтите во Европа и на Блискиот Исток, Индо-Пацифичкиот регион „останува приоритетно подрачје“ за САД. Вашингтон се обидува да формира нови сојузи и партнерства во регионот, стравувајќи од растечката воена моќ и влијанието на Кина.
Форумот, на кој учествуваат бројни воени функционери од целиот свет, се одржува една недела по големата воена вежба на Кина, за време на која кинески воени бродови и воени авиони го опкружија Тајван, одметнатиот остров кој Кина го смета за дел од својата територија.