Протестите продолжија 24-та недела по ред со демонстрации низ Израел на над 150 локации, додека централниот протест, како и обично, се одржа на улицата Каплан во Тел Авив.
Според проценките на израелската компанија Решенија на толпата, која го проучува однесувањето на толпата на јавни настани, околу 100.000 луѓе се собрале на главниот протест на улицата Каплан во Тел Авив.
Главен говорник на протестот во Тел Авив беше поранешната министерка за правда и надворешни работи на Израел, Ципи Ливни, која на собирот дојде облечена во маица со натпис „еднаквост“, објави Ерусалим пост.
Во својот говор таа ја обвини владата дека предизвикала „фундаментална штета на израелската демократија“.
„Владата веќе промовира фашистички одлуки и закони кои засекогаш ќе го променат ликот на Израел. Одлуките и законите кои ја бришат еднаквоста, воспоставуваат верска супериорност над секуларистите, еврејска надмоќ над Арапите и супериорност на корумпираните поединци над судиите“, рече Ливни, обраќајќи им се на демонстрантите.
На протестот во Каркур, десетици луѓе вееја израелски знамиња во знак на протест против владата, а полициските сили беа на терен за да го одржуваат редот и да го насочат сообраќајот.
Протестите оваа недела следеа по драматичните настани во Кнесетот за време на гласањето за Комисијата за избор на судии во средата, што доведе до замрзнување на преговорите што се водеа во последните месеци меѓу коалицијата и опозицијата во претседателската резиденција.
