Кризниот состанок, кој останува неизвесен, има цел да се справи со последното разгорување на тензиите во регионот.
ЕУ и САД стравуваат дека растечкиот конфликт меѓу двата соседи може да излезе од контрола и да го уништи напредокот што беше постигнат претходно оваа година во нормализацијата на односите.
Жосеп Борел, шефот за надворешна политика на блокот, испрати покана до претседателот на Србија Александар Вучиќ и косовскиот премиер Аљбин Курти за директни разговори во Брисел, кои првично се очекуваше да се одржат некаде оваа недела.
Повикот за дијалог, сепак, досега беше игнориран бидејќи ниту еден од лидерите не го потврди своето учество.
„Поканата е можност што им се нуди и на премиерот Курти и на претседателот Вучиќ да покажат дека на крајот на краиштата можат да бидат и строги и да се обидат да најдат решение“, рече во понеделникот попладне Питер Стано, портпаролот на Борел.
„Ова не е за да го задоволат Брисел. Станува збор за иднината, ова е за европската иднина на луѓето на Косово и во Србија. Неангажманот неизбежно ќе има последици за граѓаните на Косово и во Србија“, продолжи портпаролот.
„Ова е исклучиво одговорност на двајцата лидери: претседателот Вучиќ и премиерот Курти. Тоа не е одговорност на никој друг.“
Стано зборуваше за „мошне неконструктивни јавни забелешки“ искажани последниве денови, јасна референца за коментарите на Вучиќ за време на викендот.
Зборувајќи за новинарите, српскиот лидер ја отфрли потенцијалната средба како „залудна“ и „сосема бесмислена“ во сегашните околности.
„Немам што да попуштам понатаму, би го направил тоа по милионити пат, но немам каде, немам што повеќе да попуштам и тоа е тоа“, изјави Вучиќ во неделата.
„Курти сака војна по секоја цена. Тоа создава средина на постојана провокација и конфликт.“
Во меѓувреме, Курти рече дека сѐ уште не одлучил дали ќе присуствува на состанокот во Брисел и дека чека да добие дополнителни информации за состојбата на тројцата косовски полицајци што се приведени во Србија.
Апсењата, кои Приштина ги опиша како чин на киднапирање, се последното поглавје од серијата епизоди што драстично го зголемија непријателството меѓу Србија и Косово.
Првиот знак на немири дојде на крајот на април, кога етничките Срби ги бојкотираа изборите во четири општини на северно Косово, каде што се мнозинство. Ова доведе до официјален одѕив од помалку од 3,5% и повици да се повтори гласањето.
И покрај тоа, косовските власти им дозволија на избраните градоначалници, кои се етнички Албанци, да ги заземат своите функции. Одлуката предизвика гнев кај етничките Срби и судири со мировниците на НАТО, кои меѓународната заедница жестоко ги осуди.
Вучиќ тогаш нареди распоредување војници на границите на највисоко ниво на борбена готовност. Неколку дена подоцна, по повиците за деескалација, српските сили уапсија тројца косовски полицајци, инцидент што останува обвиен со неизвесност, вели Еуроњуз.
Белград тврдеше дека полицајците илегално преминале на српска територија носејќи пиштоли, но Приштина рече дека тие биле „киднапирани“ додека патувале „по пат на Косово што го користат српските шверцери“.
Косово возврати со забрана за влез на сите возила со српски регистарски таблички, мошне експлозивно прашање што во минатото беше извор на гранични расправии.
Пресвртот на настаните покренува сериозни прашања за одржливоста на дијалогот Белград-Приштина, договор со посредство на ЕУ што беше привремено склопен во февруари со цел да се нормализираат врските и да се решат долгогодишните прашања, како што се регистарските таблички и учеството во меѓународните организации.
„Високиот претставник (Жозеп Борел), а исто така и земјите-членки на ЕУ очекуваат поразумен однос од партнерите што се стремат да ѝ се приклучат на Европската Унија“, рече денеска Стано, истакнувајќи дека недостигаат „значајни“ чекори за деескалација.
„И двајцата се поканети и очекуваме да дојдат без предуслови. Наоѓањето решение е, пред сè, во интерес на луѓето на Косово и во Србија.“
