Белгиските, но и европските земјоделци бараат дополнителна помош за справување со кризата во индустријата – пред сè, укинувањето на претерано долгите и комплицирани административни процедури. Тие протестираат и за Законот за обновување на природата и бараат намалување на задолжителниот процент на површините наменети за пошумување, правична исплата и укинување на трговските договори за кои велат дека се неправедни бидејќи го загрозуваат европското земјоделство.
Тие пристигнаа во Брисел во текот на ноќта помеѓу понеделникот и вторникот и се упатија на главните локации – плоштадот Луксембург пред Европскиот парламент и улицата Де ла Луа, каде што се наоѓаат Европската комисија и Европскиот совет. Донесоа бали слама што ги фрлаа по улицата, палеа логорски огнови од кои извиваше густ чад, петарди, огномет, сирени, музика….
Сите патишта и тунели што од тој дел на градот водат кон Европската комисија и центарот на Брисел се затворени за сообраќај, додека јавниот превоз во тој дел на градот беше суспендиран или пренасочен за време на протестот.
Европските земјоделци веќе протестираа во Брисел на 1 и 26 февруари и добија голем број олеснувања за индустријата, од враќање на субвенциите за дизел гориво до намалување на површините неопходни за пошумување. На тие протести имаше и насилство и оштетување на јавен имот, па неколку лица завршија пред судот за прекршоци. Неколкумина ќе треба да одговорат на поканата на судијата во кривичната постапка за напад на полицијата.
