Додека Соединетите Држави се обидуваат да постават меѓународни стандарди надвор од орбитата на Земјата, Канцеларијата за наука и технологија на Белата куќа (ОСТП) ѝ наложи на американската вселенска агенција до крајот на 2026 година да направи план за, како што велат, координираното лунарно време.
„Додека НАСА, приватните компании и вселенските агенции низ светот почнуваат мисии на Месечината, Марс и пошироко, важно е да се воспостават стандарди за небесното време заради безбедност и точност“, рече заменик-директорот за национална безбедност на ОСТП, Стив Велби.
Тој рече дека „времето минува поинаку“ во зависност од положбата во вселената, и дека времето се чини дека поминува побавно онаму каде што гравитацијата е посилна, односно во близина на небесните тела. „Доследната дефиниција за времето меѓу операторите во вселената е од клучно значење за успешната свесност за вселенската ситуација, навигацијата и комуникациските способности“, рече Велби.
Белата куќа вели дека целта е координираното лунарно време, или ЛТЦ, да се поврзе со координираното универзално време (УТЦ), примарниот временски стандард што се користи низ целиот свет за регулирање на времето на Земјата.
Белата куќа ја упатила НАСА да соработува со министерствата за трговија, одбрана и транспорт за да развие стратегија за временски стандард што ќе ги подобри навигацијата и мисиите, особено во цислунарниот простор помеѓу Земјата и Месечината (регионот на вселената од Земјата до Месечината вклучувајќи го и регионот околу површината на Месечината).
Новиот стандард ќе се фокусира на четири карактеристики: следливост до УТЦ, доволна точност за поддршка на прецизната навигација и наука, отпорност на губење контакт со Земјата и приспособливост на средини надвор од цислунарниот простор.
„Токму како што времето на Земјата е поставено со множество од атомски часовници на Земјата, множество од часовници на Месечината може да го постави лунарното време“, рече ОСТП.
САД планираат да се вратат на Месечината во 2026 година, што ќе биде прво слетување со екипаж на Месечината по Аполо 17 во 1972 година.
