Ангелов информираше дека до денеска попладне низ Македонија се регистрирани повеќе од 30 пожари на отворено од кои 15 се активни.
„Но за жал се појавуваат нови и нови пожари“, изјави Ангелов.
„Најголем е оној што утрово избувна на депонијата во Дојран што ја зафати околната вегетација и се прошири кон блиската населба. Изгорени куќи нема освен две кои се благо зафатени и имаат сосема мали оштетувања“, информира Ангелов.
Тој кажа дека денеска повторно е активиран ЕУ механизмот и побарана е странска помош од воздухоплови.
„Ветерот што дува силно прави проблеми во воспотавување на контрола врз пожарите. Апел до сите граѓани кои живеат во близина на пожарите, но и оние кои ќе чујат дека во нивна близина има пожар веднаш да се евакуираат и да не чекаат огнот да дојде до селото освен ако не е организирана одбрана на селото од локалните власти. Во моментов пет луѓе се заробени во куќа во село Стројменци, светиниколско. Хеликоптер на МВР е упатен таму за да фрли вода околу куќата за да може да бидат извлечени луѓето. Апелирам и до сопствениците на куќи и викендици да направат таканаречен мек појас кој доколку пожарот се приближи до нивните куќи да не може да го премине тој противпожарен појас“, рече Ангелов.
Друг голем и сериозен пожар е кај Свети Николе кој се движи кон Куманово, а таму пожарот го гаснат три ер трактори. Пожари се регистрирани и во Старо Нагоричане каде постои закана да бидат зафати неколку напуштени села како и во Куманово, Пробиштип и Кочани.
