Алушовски ќе биде тренер на Охрид кој ќе има високи амбиции во следната сезона.
„Среќен сум што повторно после двегодишна пауза се враќам во македонакиот ракомет, а посебно затоа што го превземам амбициозниот проект на РК Охрид. Во разговор со градоначалникот на Охрид г-дин. Кирил Пецаков и се она што ми беше презентирано како идни планови на клубот претставуваат убав и голем предизвик за мене да сите заедно направиме од РК Охрид репрезент на градот кој несомнено сака спорт и знае што е квалитетен спорт. Среќен сум и возбуден бидејќи претстои макотрпна работа на сите во клубот да го доведеме РК Охрид на едно повисоко скалило односно клуб кој ќе настапува во Европа и достојно ќе го репрезентира македонскиот и охридскиот спорт”, изјави новиот тренер на ГРК Охрид, Алушовски.
Клубот промовираше и четири сериозни засилувања за следната сезона. Голманот Даниел Ѓорѓески, левото крило Гоце Ојлески, десното крило Никола Стоилевски и специјалистот за одбрана Милорад Кукоски се нови ракометари на Охрид.
Ѓорѓески доаѓа од унгарскиот тим Будакалас, а пред тоа настапуваше за: Металург, РК Вардар и Пелистер.
„Среќен сум што се враќам назад во Македонија и посебна чест ми е што ќе бидам дел од ваков одличен проект и тим како што е Охрид. Охрид е сериозна екипа со големи амбиции, а јас се надевам дека оваа сезона ќе ги исполниме сите цели и сите заедно ќе се радуваме на многу победи”, изјави Ѓорѓески.
Македонското репрезентативно крило, Гоце Ојлески пристигна во Охрид откако со Пелистер ја освои шампионската титула.
„Драго ми е што ќе сум дел од ракометниот клуб Охрид, клуб кој што покажува сериозност и квалитет во македонскиот ракомет. Се надевам следната сезона ќе ни биде успешна и ќе славиме многу победи”, изјави Ојлески.
24-годишниот Стоилевски во Орхид доаѓа од вториот тим на Пелистер. Претходно има настапувано за првиот тим на битолчани, за Металург и Бутел.
„Драго ми е што ќе бидам дел од екипа која има одлични планови и цели за во иднина кои би ми помогнале многу да напредувам како играч”, изјави Стоилевски.
И Кукоски како и Ојлески, во Охрид доаѓа откако ја освои шампионската титула со Пелистер.
„Мило ми е што доаѓам во клуб со европски амбиции, кој расте од година во година. Сигурен сум дека ќе ги оправдаме очекувањата на управата и публиката”, изјави Кукоски.
