Како што информираат од ДУИ, Ахмети и Рокас, разговарале за сите политички прашања во земјава, за неопходните реформи за европска интеграција, за легитимитетот и Охридскиот договор, како и за изборите во Македонија.
Како што се наведува, Ахмети го информирал амбасадорот Рокас дека ДУИ е партија која ни за момент не се колеба од својата евроатланска определеност и ориентација.
„ За нас евроинтеграциите се без алтернативи и ДУИ дава целосна поддршка за продолжување на преговорите и спроведување на реформите без никакво одлагање и со политички консензус“ изјавил Ахмети.
Во однос на Охридскиот договор, Ахмети потсетил дека ЕУ и САД се гаранти на мировниот договор и дека меѓуетничките односи се, како што се наведува, „многу оптоварени со непромислените чекори на владата во однос на албанскиот јазик, етничката припадност, правичната и соодветна застапеност“.
„Македонија и Македонците не изгубија ништо од рамноправноста со Албанците, а државата воопшто не е загрозена од спроведувањето на Охридскиот договор. Политичкиот дијалог во државата мора да го почитува изборниот легитимитет на легитимните претставници на етничките заедници бидејќи тоа овозможува стабилност, безбедност и социјална кохезија“, се вели во соопштението.
Ахмети и на средбата со евроамбасадорот Рокас повторил дека „решението за оваа тешка ситуација се заедничките парламентарни и локални избори во октомври 2025 година“.
