Таа одговарајќи на новинарско прашање при посетата на селото Радово по повод пуштање во употреба на предучилишен едукативен центар преку програма на УСАИД, нагласи дека е запознаена оти законот е влезен во собраниска процедура, но дека не е ја знае неговата содржина и додаде дека е важно политичките лидери да ја запознаат јавноста со потребата од негово носење.
„Граѓаните во земјата треба да разберат што се случува и зошто тоа се случува и нивните избрани лидери да комуницираат со нив зошто тоа е важно. Ова не е прв закон за амнестија, секако нема да биде последен и ние одблизу го следиме процесот за да го видиме крајниот резултат“, рече Агелер.
Кабинетот на претседателот на Парламентот вчера информира дека законот веќе е доставен до пратениците и е предложен да се носи по скратена постапка.
Премиерот Димитар Ковачевски вчера беше дециден дека законот не е правен за личности, туку за дела од помал обем со намера за релаксирање на пренатрупаните капацитети, а од опозицијата остануваат на ставот дека со законот се опфатени „озлогласени криминалци“.
Претходно министерот за правда, Кренар Лога на средба со новинарите изјави дека во јавноста преовладува мислење дека предлог-законот за амнестија не е нов туку тоа е истиот закон што беше донесен во 2018 година, а предлагачи беа сите политички партии.
„Во овој предлог-закон сега се додадени неколку кривични дела кои нема да бидат опфатени со амнестијата“, изјави министерот за правда Кренар Лога на средбата со новинарите.
