Во текот на ноќта, Русија го изврши својот петти напад со беспилотни летала врз Киев за две недели, при што украинските системи за противвоздушна одбрана ги уништија сите ракети пред да стигнат до главниот град, соопшти украинската војска.
Украинските воздухопловни сили на Телеграм објавија дека нивните системи за противвоздушна одбрана уништиле 35 од 39 беспилотни летала и две крстаречки ракети лансирани од Русија во текот на ноќта. Според воздухопловните сили, 10 украински региони биле цел на проектили.
Засега не е јасно колку дронови биле лансирани на Киев. Нема жртви и не е забележана значителна штета, изјави на Телеграм Серхиј Попко, шеф на воената администрација на главниот град на Украина.
„Само во текот на минатата ноќ, руската војска употреби речиси 40 Шахеди против Украина. Она што е важно, повеќето од нив беа соборени од нашите бранители на небото“, рече Зеленски на Телеграм, мислејќи на беспилотните летала.
Тој рече дека е неопходно да се уништат руските бомбардери во руските воздушни бази за да се заштити Украина од воздушни напади. „Оружјето со долг дострел треба да биде фер одговор на рускиот терор. Сите што нè поддржуваат во ова ја поддржуваат одбраната од тероризмот“, рече Зеленски.
Во Лондон во петокот, тој го повтори својот повик до западните сојузници да дозволат удари со долг дострел против Русија, велејќи дека Британија треба да се обиде да ги убеди своите партнери да ги укинат ограничувањата за употребата на таквото оружје.
Членките на НАТО зазедоа различни пристапи за тоа како Украина може да го користи оружјето што тие го донираат.
Некои јасно ставија до знаење дека Киев може да ги користи за напади врз цели во Русија, додека САД дозволија нивното оружје да се користи само во граничната област против цели кои ги поддржуваат руските воени операции во Украина.
