Говорејќи преку видео врска, тој рече дека светот може да се согласи околу збир на дефиниции за тероризмот. „Не силувајте жени. Не убивајте. Не третирајте ги децата како трофеи. Не полнете села и градови со крв. Не пукајте во цивили во автомобили“, тоа би требало да биде основата, рече тој.
Тој рече дека Хамас и Русија ја користеле истата тактика и дека израелските новинари кои биле во Украина и биле сведоци на последиците на тамошните злосторства сега гледаат дека истото се случува и во нивната татковина.
Во она што може да се смета за кодирана критика насочена кон републиканците во американскиот Конгрес, Зеленски рече: „Ова не е време за повлекување од меѓународната сцена во внатрешни спорови. Не е време да се молчи“, рече тој, додавајќи дека луѓето не треба да се преправаат дека тероризмот на еден континент нема да влијае на остатокот од светот, пишува Гардијан.
Украинскиот претседател го поврза Иран со инвазијата на Украина и нападот врз Израел. „Иран не може да каже дека нема никаква врска со она што се случува во Украина ако ѝ продава беспилотни летала шахед на Русија. Исто така, не може да тврди дека нема никаква врска со она што се случува во Израел ако неговите функционери тврдат дека го поддржуваат Хамас“, рече украинскиот претседател.
