Се вели дека леталото Мк-11 Аурора ја надминало брзината на звукот за прв пат на 12 ноември, достигнувајќи 1,1 мах и искачувајќи се на височина од 25,1 километар.
„Ова е двојно повеќе од комерцијалните авиони и е прв пат цивилен авион да стане суперсоничен по Конкорд“, се вели во соопштението на компанијата. Пробниот лет беше извршен во близина на планината Кук на јужниот остров на Нов Зеланд.
Дон Ероуспејс, со седиште во Холандија и Нов Зеланд, развива летало на ракетен погон што може да се користи за лансирање сателити. Таа во последните неколку месеци го тестираше својот најнов модел.
„Ова достигнување го истакнува огромниот потенцијал на авионите со ракетен погон да постигнат досега невидени перформанси“, рече Стефан Пауел, извршен директор на Дон Ероуспејс.
Компанијата соопшти дека Мк-11 Аурора е исто така најбрзиот авион што некогаш се искачил од нивото на земјата до височина од 20 километри.
Аурора е дизајнирана да лета до работ на вселената двапати во еден ден со брзина од 3,5 маха придвижувана од чист ракетен погон.
