„Постапката за обновување на членството на Соединетите Американски Држави во УНЕСКО е спроведена со кршење на статутот на организацијата и заобиколување на актуелниот деловник за генералната конференција – без внимателно проучување на сите клучни прашања поврзани со ова, пред сѐ во однос на целосна и безусловна отплата на долгот на Вашингтон за уплата во редовниот буџет на организацијата“, рече Захарова во пораката објавена на веб-страницата на Министерството, пренесува РИА Новости.
На почетокот на јуни, генералниот директор на УНЕСКО Одри Азулеј објави дека САД официјално ја известиле организацијата за своето обновено членство.
САД одлучија да го вратат својот статус на членка на УНЕСКО шест години откако владата на поранешниот претседател Доналд Трамп реши да го повлече членството.
Американскиот државен секретар Ентони Блинкен на почетокот на годинава изјави дека Вашингтон има намера да се врати во УНЕСКО.
Тој наведе дека многу земји му замеруваат на Вашингтон дека таквите организации не ги сфаќа сериозно.
Поради оваа причина, додаде Блинкен, по обновувањето на членството, САД имаат намера да плаќаат членарина навреме.
Според медиумите, планот за враќање на САД бил договорен како резултат на долгорочни преговори меѓу Стејт департментот и претставници на организацијата, а меѓу другото, вклучува и распоред за отплата на американските долгови.
Руското Министерство за надворешни работи посочува дека Москва го поздравува враќањето на САД во УНЕСКО, но во согласност со повелбата на организацијата, според која Вашингтон треба целосно да го врати огромниот долг од 612 милиони долари.
