Претседател на Алтернатива Африм Гаши на денешната седница на Комисијата за уставни прашања изјави дека начинот на кој е изготвен предлогот за уставни измени и времето кога е предложен не е европски. Според него еден предлог „кој се плаши од борбата против корупцијата и се плаши од употребата на албанскиот јазик не е во европски дух“.
„Пристапувањето кон ЕУ ви е само лага. Некој што мисли за интеграција на државата во ЕУ не се однесува како што се однесувате вие – да најдеме некој виновник за да не поминат уставните измени, а ние да победиме на изборите. Ова е вашиот слоган, бидејќи вие не размислувате за државата и иднината на граѓаните, туку за иднината на вашите партии и за лично за вас. Ќе поставам прашање – Зошто овој предлог доаѓа на овој начин? Зошто е изготвен на овој начин? Зошто во овој предлог за пристапување кон измена не е и нашиот амандман за борба против корупцијата? Како што знаете, ние предложивме јавно да не застарат делата за корупција, но Владата го донесе предлогот без нашиот предлог. Кој се плаши од незастарувањето на предметите за корупција? Уште колку лица како Сашо Мијалков треба да заштитите или уште колку предмети треба да застарат за вие да заштитите некои политичари? Можеби сакате да го заштитите Рамиз Мерко кој беше на црната листа? Ве молам кажете ми кој се плаши од борбата против корупција? Дали има такви лица и во оваа сала? Дали Северна Македонија не би била поевропска со оваа измена? Секако дека на овој начин, односно ова ќе беше проблем за еден дел од нив, меѓутоа нашите граѓани ќе беа поспокојни, а политичарите ќе размислеа два пати пред да навлезат во црвена зона“, рече Гаши.
Забележа и зошто во овој предлог не е опфатено барањето во однос на 20-те отсто Албанци во Уставот.
„На која политичка партија и пречи албанскиот јазик да се именува исто како и македонскиот јазик, а не да се именува на дискриминирачки начин? Зошто тогаш не го вметнавте и овој дел во предлог-изменувањето? Дали албанскиот јазик е помалку важен од интеграцијата?“, праша Гаши.
Гаши на крајот на својот говор истакна дека неговите партиски органи координирани со другите партии ќе ја следат дискусијата и ќе ги очекуваат одговорите на неговите прашања.
За ДУИ пак, потребата за уставните измени стана почетна тема на секоја политичка, економска или културна дебата, бидејќи влијае на сите области и врз секој човек без разлика на неговата нација, јазик, култура, политичка припадност, социјален статус,
Целта на уставните измени е обезбедување на подобра иднина, оцени пратеничката Арта Билали Зендели од ДУИ на денешната расправа на Комисијата за уставни прашања.
„Потребата за уставните измени неслучајно е главна тема на политичкиот и општествениот живот. Оваа тема стана почетна тема на секоја политичка, економска или културна дебата, бидејќи влијае на сите области и врз секој човек без разлика на неговата нација, јазик, култура, политичка припадност, социјален статус“, рече Билали Зендели.
Според неа, во државава успешно се одржува мултиетничка, мултикултурна и мултиверска демократија и затоа, како што рече, вметнувањето и признавањето на шест нови народи ќе ја зголеми вредноста на Македонија.
„Минатата година гласавме за преговарачка рамка, а потоа се одржа и првата меѓувладина седница меѓу Македонија и Албанија од една страна и ЕУ од другата страна. И овој пат нашата судбина во оваа комплицирана состојба не наведе да надминеме уште една пречка за гласање на уставните измени со вметнување на шест други народи во Преамбулата на Уставот и два други члена“, изјави таа.
