Во СДСМ расколот е очигледен, покрај тоа што мешаат роднини и јавно излегуваат на говорница и прозиваат луѓе, почнале и меѓусебно да се местат, велат од ВМРО-ДПМНЕ.
„Прес конференциите на Кузеска се комедија за народот. Ја советуваме Кузеска да внимава на своите сопартијци, повеќе од јасно е дека некој внатре од партијата ја мести. Филипче, Кузеска и останатите фотелјаши функционери ја донесоа партијата СДСМ пред целосен колапс. Лошиот пиар на Венко Филипче ќе ја доуништи и така веќе уништената и поразена СДСМ“, реагираат од ВМРО-ДПМНЕ.
Сепак од владеачката партија не појаснуваат дали имињата на Иван Иванов, син на поранешниот претседател Ѓорге Иванов и на Анастасија Илиеска сопругата на ТВ водителот Богдан Илиески се истите имиња кои се назначени за членови на управниот одбор на МЕПСО.
Министерството за транспорт и врски како единствен акционер во МЕПСО вчера соопшти дека ги назначило новите членови на Надзорниот одбор на компанијата. Надозрниот одбор пак, завчера ги именува и новите членови на управниот одбор, а тоа се, Бурим Љатифи кој воедно е и новиот генерален директор на МЕПСО, Александар Пауноски кој ќе биде заменик директор и членовите Сашко Лакински, Васе Јовевски, Анастасија Илиеска, Иван Иванов и Мартин Малиновски.
