„Овој состанок ќе вклучува министри за надворешни работи, шефови на разузнавачките служби и советници за национална безбедност. Целта е да се постигне напредок во завршувањето на приемот на Шведска во НАТО“, рече Столтенберг на прес-конференција во Литванија.
Тој додаде дека разговарал со турскиот претседател Реџеп Таип Ердоган во неделата, а контактирал и со владите во Стокхолм и Хелсинки. Тие се договорија да одржат состанок на високо ниво во Брисел пред самитот на НАТО на 11 и 12 јули во Вилнус, главниот град на Литванија.
По руската инвазија на Украина, Шведска и Финска поднесоа барање за членство во Алијансата во мај 2022 година. Финска е членка на НАТО од април оваа година, а Шведска сѐ уште чека одобрение од Турција и Унгарија. Анкара го блокира приемот на Шведска, тврдејќи дека Шведска не презема доволно мерки против „терористичките организации“.
Претставниците на земјите се состанаа во неколку наврати за да се обидат да ја решат турската блокада, последен пат во Анкара во средината на јуни. На тој состанок Ердоган изрази сомневање дека ќе го одобри влезот на Шведска до самитот на НАТО.
