Шолц рече дека Германија ќе продолжи да ѝ помага на Украина на хуманитарен, политички и финансиски план и дека ќе продолжи да помага со оружје. „Нашата поддршка нема да се поколеба. „Германската солидарност со Украина е силна и трајна“, изјави германскиот канцелар.
Тој укажа и на новиот пакет воена помош во вредност од 2,7 милијарди евра, што германската влада го потврди во саботата. Шолц уште еднаш ја осуди руската инвазија на Украина и го изрази своето восхитување за „херојскиот отпор“ што Украинците му го нудат на рускиот агресор.
Зеленски, кој претходно имаше состанок со германскиот претседател Франк-Валтер Штајнмаер, се заблагодари за германската поддршка. „Новиот пакет воена помош претставува многу важна и силна поддршка. Украинскиот народ секогаш ќе биде благодарен за поддршката на Германија“, рече Зеленски на заедничката прес-конференција во кабинетот на канцеларот.
Тој објасни дека Украина моментално работи на враќање на окупираните територии и објасни дека украинската војска не напаѓа цели на руска територија. „За такво нешто немаме ниту време, ниту сила, ниту оружје. Нашата цел е да ги вратиме неправедно окупираните територии“, рече Зеленски.
Украинскиот претседател апелираше до Германија да придонесе за создавање „коалиција за испорака на борбени авиони во Украина“. Шолц реагираше воздржано, посочувајќи дека Германија ќе се фокусира на „системите за оружје испорачани досега“.
Во исто време, Зеленски нагласи дека Украина е подготвена за мировни преговори, кои мора да се засноваат на украинските позиции и мировен план, што значи целосно повлекување на руските сили. „Ова е војна што се одвива на нашата територија“, рече Зеленски.
Шолц најави дека попладне заедно со украинскиот претседател ќе отпатува за Ахен, каде на украинскиот претседател ќе му биде врачена наградата Карло Велики, која се доделува на луѓе кои „дадоа посебен придонес во процесот на европското единство“.
Програмата на посетата на украинскиот претседател се чуваше во тајност до последен момент. Зеленски пристигна во Берлин од Италија со авион на германската влада и во придружба на германски воени авиони.
