Родонг Синмун, официјалниот весник на владејачката Работничка партија на Кореја, објави дека фокусот на луѓето треба да биде да се зачуваат портретите на лидерот Ким Џонг Ун, неговиот татко Ким Џонг Ил и неговиот дедо, основачот на Северна Кореја, Ким Ил Сунг.
Весникот, исто така, ги повика граѓаните да ги чуваат големиот број статуи, мозаици, мурали и други споменици посветени на династијата Ким, која владее со Северна Кореја од нејзиното основање во 1948 година.
Канун, кој го погоди Корејскиот полуостров во четвртокот, се очекува да се пресели на север во петок.
Природните катастрофи може да имаат разорно влијание врз сиромашната Северна Кореја, каде слабата инфраструктура и уништувањето на шумите ја зголемија нејзината ранливост од поплави.
Тропската бура веќе предизвика поплави и лизгање на земјиштето во Јужна Кореја, при што е пријавен еден смртен случај, а повеќе од 16.000 луѓе беа принудени да се евакуираат од домовите во загрозените области.
Севернокорејската државна новинска агенција КЦНА соопшти дека „сите сектори и единици“ во земјата „водат динамична кампања за справување со катастрофалната абнормална клима“. Се додава дека се издадени предупредувања за „силен ветер, пороен дожд, високи бранови“.
Пристигнувањето на Канун доаѓа само неколку недели откако пороен дожд предизвика поплави и лизгање на земјиштето во кои загинаа најмалку 47 луѓе во Јужна Кореја.
Наредбата да се заштитат сликите на Ким е потсетник на важноста што режимот ја дава на симболиката за да ја зајакне својата легитимност, пишува Гардијан.
Портретите на Ким Џонг Ил и Ким Ил Сунг го красат секој дом и канцеларија во земјата, а луѓето можат да се соочат со егзекуција за нивно оштетување, дури и случајно, според НК њуз.
„Да не заборавиме дека Северна Кореја меѓу другото е и теократска држава“, изјави за Гардијан Андреј Ланков, професор на Универзитетот Кукмин.
„Овие статуи и портрети не се само симболи, туку се свети религиозни симболи – во суштина икони. Секоја религија од памтивек очекува нејзините верници да бидат подготвени да умрат – или барем да страдаат – за да ги спасат светите икони“.
Севернокорејските државни медиуми јавија дека на припадниците на војската и на владејачката партија им е наредено да подготват мерки за справување со поплавите и да ги спасат земјоделските култури, поради информациите дека невремето може да го погоди главниот град Пјонгјанг.
