Сегашната криза на Блискиот Исток предизвикана од минатонеделниот ненадеен упад на палестинската милитантна група Хамас во јужен Израел е доказ за неспособноста на Вашингтон да ги решава конфликтите, изјави рускиот претседател Владимир Путин.
„Верувам дека многумина би се согласиле со мене дека тоа е еклатантен пример за неуспесите на политиката на САД на Блискиот Исток. Тие се обидоа да го монополизираат мировното решение, но за жал, не посветија внимание на барање компромиси што би биле прифатливи за двете страни“, рече денеска рускиот лидер.
Наместо тоа, Вашингтон изврши притисок врз двете страни во обид да им наметне свои решенија, додаде тој.
САД „никогаш не ги зедоа предвид основните интереси на палестинскиот народ“, рече Путин. Тие интереси првенствено вклучуваат создавање независна палестинска национална држава, како што е наведено во резолуциите на Советот за безбедност на ОН, истакна Путин на средбата со ирачкиот премиер Мохамед ал Судани во Москва. Рускиот претседател рече дека верува оти двете нации се обединети во давањето приоритет на минимизирање на штетата направена врз цивилите од двете страни во израелско-палестинскиот конфликт.
И други високи руски функционери, вклучително и министерот за надворешни работи Сергеј Лавров, претходно ги обвинија САД за обновените непријателства. Највисокиот руски дипломат во понеделникот предложи таканаречениот квартет посредници од Блискиот Исток – кој ги вклучува САД, Русија, ЕУ и ОН – да преземе водечка улога во мировните преговори. САД, рече тој, го оставија настрана овој механизам за да го „монополизираат“ процесот за своја корист.
Хамас, со седиште во Газа, во саботата почна ненадеен напад на израелска територија, совладувајќи ја противвоздушната одбрана на земјата со огромни ракетни баражи и изведувајќи молскавичен напад. Неговите борци убиваа цивили и земаа заложници со цел да ги разменат за затвореници што се во израелски притвор.
Израел одговори со воена операција насочена кон Газа, велејќи дека неговата цел е да го уништи Хамас. Малиот крајбрежен појас е дом на околу 2 милиони жители, чии животи се во голема мера погодени од израелската блокада, која е во сила од 2007 година.
