Либанските здравствени власти неделава го потврдија првиот случај на колера во услови на ескалација на конфликтот меѓу Израел и милицијата Хезболах поддржана од Иран.
Колерата е заразна болест која е пропратена со дијареа и повраќање и се шири преку контаминација на вода, на пример кога залихите на вода се загадени со фекалии. Ризикот од појава секогаш постои кога многу луѓе мора да живеат заедно во недоволно хигиенски услови.
Во Либан повеќе од милион луѓе се раселени поради израелските напади во борбата против Хезболах. Многумина живеат во оскудни услови во засолништа или на отворено и немаат пристап до чиста вода.
Колерата избувна во Либан за прв пат по повеќе од 30 години во октомври 2022 година. Регистрирани се повеќе од 8.000 сомнителни случаи на колера, а 23 лица починаа пред да заврши епидемијата во јуни 2023 година. Оваа болест е особено опасна за малите деца.
Во моментов се спроведува тестирање на луѓе и преглед на примероци од вода. Во соработка со партнерски организации, СЗО се обидува да обезбеди повеќе чиста вода за пиење и да го подобри отстранувањето на отпадните води. Дополнително, во земјата веќе се донесени медицински материјали за лекување на заболените од колера.
Кампањата за вакцинација против колера траеше од почетокот на август, но беше прекината поради ескалацијата на конфликтот меѓу Хезболах и Израел.
