Според градоначалникот на Дојран Анго Ангов, на неколку места сè уште тлеат остатоци од пожарот, а со механизација во текот на денот ќе почне да се затрупуваат делови од депонијата од каде избувна големиот пожар.
Во гаснењето на пожарот учествуваа месното население, пожарникари од Дојран, Валандово, Гевгелија и Струмица, како и еден хеликоптер.
Градоначалникот Ангов, вчера посочи дека пожарот најверојатно е подметнат, бидејќи на местото каде што избувнал пожарот пронашле канти од моторно масло.
Фотографија од најдените канти на социјалните мрежи објави Кире Михаилов, заменик директор на „Национални шуми“ кој упати прашање до градоначалникот Ангов како е можно ако имало чувар на депонијата, да не види што се случува.
„Ова е материјалот денеска што беше пронајден на депонијата во Дојран откаде што почна пожарот. Од причина што градоначалникот Ангов тврди дека го владее теренот и не е како мене да седи само во канцеларија, дали знае каде се најдени тубите и зошто таму каде што се најдени неговите вработени ги немаат видено“, прашува Михаилов.
Градоначалникот Ангов, пак го обвини дека ако сака да помогне треба да излезе од канцеларија и да оди на терен, иако Михаилов е во екот на пожарите низ најопасните терени и постојано со екипите на терен и додава дека иако било заклучено, внатре имало чувар.
