Денес, државната новинска агенција КЦНА соопшти дека Ким, кој го следел лансирањето и потоа организирал банкет за научниците и персоналот на вселенската програма, прегледал фотографии од две локации на американската влада направени доцна синоќа. КЦНА, исто така, соопшти дека сателитот снимил фотографии од американска поморска база, бродоградилиште и аеродром во Вирџинија, додавајќи дека фотографиите содржеле четири американски носачи на авиони на нуклеарен погон и еден британски носач на авиони.
Се очекува режимот во Пјонгјанг да се обиде да извлече максимална пропагандна вредност од лансирањето минатиот вторник, што веднаш наиде на осуда од Вашингтон и ги зголеми тензиите долж силно вооружената меѓукорејска граница, пишува Гардијан.
Пјонгјанг, исто така, истакна дека сателитот фотографирал воени инсталации во Јужна Кореја, како и од американската пацифичка територија Гуам и државата Хаваи. Ниту една од тие фотографии не е објавена во јавноста. Воени претставници во Јужна Кореја велат дека веруваат дека Малигјонг-1 влегол во орбитата, но досега не можат да кажат дали е способен да прави и испраќа фотографии од вселената.
Шпионски сателит, за кој се верува дека е создаден со руска технолошка помош, вчера предизвика гнев во Советот за безбедност на ОН. Санкциите на ОН се однесуваат на севернокорејските сателити бидејќи содржат забранета технологија што се користи во програмата за балистички ракети на режимот.
„ДНРК јасно ги обелодени своите мотиви. ДНРК бесрамно се обидува да ги унапреди своите системи за испорака на нуклеарно оружје со тестирање на технологија на балистички проектили, што е јасно кршење на резолуциите на овој совет. Ова непромислено незаконско однесување им се заканува на сите соседи на ДНРК и на сите членки“, изјави пред Советот амбасадорката на Вашингтон во ОН Линда Томас-Гринфилд, користејќи го официјалното име Демократска Народна Република Кореја.
Во ретко појавување во Советот за безбедност, севернокорејскиот амбасадор во ОН Ким Сонг ги обвини критичарите за лицемерие. „Ниту една друга нација во светот не е во толку критична безбедносна средина како ДНРК. Една завојувана страна, САД, ни се заканува со нуклеарно оружје“, рече тој.
„Легитимно право за ДНРК како друга завојувана земја е да развива, тестира, произведува и поседува системи за оружје еквивалентни на оние што САД ги поседуваат или ги развиваат“, додаде тој. Тој, исто така, ги исмеа американските критики дека сателитската технологија се користи за подобрување на ракетните способности на Северна Кореја, прашувајќи дали Вашингтон ги лансирал свои сателити со „катапулт“.
Претставници на јужнокорејските разузнавачи веруваат дека Русија ѝ помогнала на Северна Кореја да го лансира Малигјонг-1 во замена за муниција за војната во Украина. Ким Џонг Ун и Владимир Путин негираа дека склучиле договор за оружје за време на нивниот самит во септември, но САД објавија дека Пјонгјанг досега доставил повеќе од 1.000 контејнери со воена опрема и муниција на Кремљ.
