Во приватно писмо до лидерите на Европската унија по посетите на Киев, Москва и Пекинг, Орбан изјави дека тоа значи дека во случај на победа на Трамп, „ЕУ треба повторно да отвори директна дипломатска комуникација со Русија и да започне преговори на високо ниво со Кина за да најде мирно решение за војната во Украина“.
Орбан исто така во писмото вели дека, врз основа на неговите неодамнешни разговори со рускиот претседател Владимир Путин, кинескиот претседател Си Џинпинг и украинскиот претседател Володимир Зеленски, „општ впечаток“ е „дека интензитетот на воениот конфликт радикално ќе ескалира во блиска иднина“.
Фајненшл тајмс имал увид во писмото на Орбан до лидерите на ЕУ, но кабинетот на унгарскиот премиер одбил да коментира. Предизборниот тим на Трамп, исто така, не одговорил веднаш на барањето за коментар.
Патувањата и средбите на Орбан со Путин, Си и Трамп во изминатите две недели, откако Унгарија го презеде ротирачкото претседателство со Европската унија, ги шокираа сојузниците во ЕУ и НАТО.
Многумина стравуваат дека Орбановата поддршка за мировно решение додека Русија сè уште контролира огромни делови од источна Украина е во корист на Кремљ и ја поткопува решеноста на Западот да го поддржи територијалниот интегритет на Киев.
„Не можеме да очекуваме никаква мировна иницијатива од Трамп до изборите. Сепак, можам со сигурност да кажам дека набрзо по изборната победа, тој нема да ја чека својата инаугурација, туку веднаш ќе биде подготвен да дејствува како посредник за мир“, напиша Орбан во своето писмо до претседателот на Европскиот совет, Шарл Мишел и другите лидери на ЕУ. „Тој има детални и добро основани планови за ова“, се наведува.
Тоа значи дека ЕУ треба да предвиди промена на американската политика, рече Орбан и или да ја прифати потребата од итни преговори меѓу Русија и Украина или да преземе поголема одговорност за финансирање на украинската одбрана.
„Повеќе од убеден сум дека при веројатниот исход од победата на претседателот Трамп, односот на финансискиот товар меѓу САД и ЕУ значително ќе се промени на штета на ЕУ кога станува збор за финансиската поддршка за Украина“, напиша Орбан во писмо до лидерите на ЕУ.
Унгарскиот премиер долго време беше најпрорускиот лидер на ЕУ, кој ги критикува западните санкции против Москва и воената поддршка за Украина додека бараше прекин на огнот и мировни преговори.
Ова е во спротивност со заедничкиот став на ЕУ и САД дека треба да ѝ се помогне на Украина во одбраната и дека само Киев може да одлучи кога да ги започне преговорите со Русија. „Нашата европска стратегија во име на трансатлантското единство ја копираше провоената политика на САД“, напиша Орбан и покрај тоа што војната започна со одлуката на рускиот претседател Владимир Путин.
„До сега немавме суверена и независна европска стратегија или политички акционен план. Предлагам дискусија за тоа дали продолжувањето на оваа политика е рационално во иднина“, се вели во писмото на Орбан.
Тој на лидерите на ЕУ им рече: „Можеме да најдеме прилика со силна морална и рационална основа за почеток на ново поглавје во нашата политика… да се обидеме да ги намалиме тензиите и/или да создадеме услови за привремен прекин на огнот и/или почеток на мировни преговори“.
Описот на Орбан за мировниот план на Трамп за Украина се совпаѓа со политичкиот документ за конфликтот напишан од двајца сојузници за поранешниот претседател, за кои се очекува да преземат високи улоги за национална безбедност во неговата администрација ако победи на изборите во САД во ноември.
Планот на Кит Келог и Фред Флејц од институтот „Америка фрст полиси“ предлага САД да продолжат да ја зајакнуваат одбраната на Украина, но идната воена помош ќе бара учество на Киев во мировните преговори со Русија.
