„По рекордното ниво на сајбер кражби во 2022 година, проценети на 1,7 милијарди долари, хакерите од КНДР (Северна Кореја), наводно, продолжиле успешно да таргетираат криптовалути и други финансиски размени на глобално ниво“, напишаа независните набљудувачи на санкции во извештајот до Советот за безбедност на ОН, што Ројтерс го доби на увид во четвртокот.
Набљудувачите, кои двапати годишно известуваат пред Советот, претходно ја обвинија Северна Кореја дека користи сајбер напади за да помогне во финансирањето на своите нуклеарни и ракетни програми. Северна Кореја ги отфрли обвинувањата за хакерски или други сајбер напади.
Мисијата на Северна Кореја при Обединетите нации во Њујорк не одговори веднаш на барањето за коментар за извештајот. Претходно вчера, севернокорејскиот лидер Ким Џонг Ун го разреши највисокиот воен генерал и повика на дополнителни подготовки за можноста за војна, зголемување на производството на оружје и проширување на воените вежби, објави државниот медиум КЦНА.
Северна Кореја е под санкции на ОН поради својата нуклеарна и балистичка ракетна програма од 2006 година. Тие мерки беа едногласно зајакнати со текот на годините, но 15-членото тело сега е во безизлез бидејќи Кина и Русија вршат притисок за нивно олеснување за да го убедат Пјонгјанг да се врати во разговорите за денуклеаризација.
Набљудувачите на ОН за санкции рекоа дека хакерите кои работат за севернокорејското Генерално биро за извидување (РГБ), нејзината главна разузнавачка агенција, „продолжија да користат сè пософистицирани сајбер техники за кражба на средства и информации“.
„Компаниите во секторот на криптовалутите, одбраната, енергетиката и здравството беа особено таргетирани“, напишаа тие во резимето на извештајот, кој треба да биде објавен во наредните недели. „КНДР продолжи да пристапува до меѓународниот финансиски систем и исто така се вклучи во незаконски финансиски операции“.
Набљудувачите пријавија континуиран нелегален извоз на јаглен и „широк спектар на мерки за избегнување на санкции кои ги спроведуваат бродови што доставуваат рафинирани нафтени производи во КНДР“. Северна Кореја, исто така, набави 14 нови бродови кршејќи ги санкциите.
„Иако границите на земјата остануваат главно затворени, обемот на трговијата се зголеми, главно поради обновувањето на железничкиот сообраќај. Голем број на странски стоки брзо се појавија“, напишаа набљудувачите, додавајќи дека продолжуваат да го истражуваат нелегалниот увоз на луксузни стоки.
Набљудувачите рекоа дека го истражуваат и наводниот севернокорејски извоз на воена комуникациска опрема и муниција и „можни случаи на продажба на оружје“.
