Во соработка со ЈП за комунални дејности на Општина Аеродром, на повеќе локации ќе бидат поставени садови каде што граѓаните ќе можат да го оставаат својот стар и дотраен мебел.
Акцијата ќе започне од населба Мичурин каде што в понеделник на 29 јули садовите ќе бидат поставени на улица Анастас Митрев зад паркот до трансформаторот, и на улица Венјамин Мачуковски до трансформаторот кај Железничка станица.
Потоа, на 30 јули, вторник, жителите на Острово својот кабаст отпад ќе можат да го оставаат на улица Владимир Комаров на броевите 9 до контејнерите, како и на број 16 зад ТЦ Скопјанка.
Кабастиот отпад е планирано да се собира речиси до крајот на септември.
„Ваквата акција се спроведува со цел да им се излезе во пресрет на аеродромци бесплатно да го отстранат стариот мебел од своите домови. Со тоа истовремено ја заштитуваме животната средина од несовесно фрлање отпад, при што се создаваат диви депонии што ја загадуваат околината, но и даваат лоша слика за Аеродром“, велат од општината.
Истовремено, Општина Аеродром најавува дека во наредниот период во голема мера ќе ги зајакне инспекциските контроли на терен. Доколку се забележи дека граѓани фрлаат кабаст и друг вид отпад на локации што не се наменети за тоа ќе се применуваат најстроги казни за таквото несовесно однесување.
