Како резултат на повеќемесечна соработка и размена на информации со Директоратот за борба против дрога од Солун, Република Грција, соопштија од Јавното обвинителство на Македонија, е утврдено дека од почетокот на 2022 година до 8 мај 2023 година, осомничените, како членови на меѓународна криминална група, заеднички делувајќи со грчки и албански државјани, организирале неовластена набавка и пренесување на кокаин од Еквадор, Јужна Америка до Солун. Притоа, секој од членовите имал своја улога при набавката, пренесувањето и складирањето на наркотичната дрога.
„Првоосомничениот, со цел неовластена набавка и пренесување на наркотичната дрога кокаин, на почетокот на 2022 година остварил средба со второосомничениот. На средбата било договорено второосомничениот да биде основач и управител и да регистрира правно лице со дејност увоз-извоз во кое целокупното работење ќе го извршува првоосомничениот, а на второосомничениот ќе му исплаќа паричен надомест од 50.000 денари месечно. Второосомничениот, согласно договорот, на крајот на јануари 2022 година основал правно лице кое во јуни истата година се јавува како основач на ново правно лице со неограничени овластувања во внатрешниот и надворешниот промет. На почетокот на оваа година, второосомничениот, по инструкции на првоосомничениот, уплатил 19.000 долари на правно лице од Еквадор за набавка на 1080 пакети банани“, соопштија од Јавното обвинителство.
Во договор со првоосомничениот, засега непознати лица во Еквадор, ја сместиле наркотичната дрога кокаин во контејнер и заедно со уште два контејнери преку пристаништето Болвар – Еквадор и ги испратиле кон пристаништето во Солун. Откако, на почетокот на овој месец, пратката пристигнала на солунското пристаниште, појаснуваат од Јавно обвинителство, првоосомничениот за транспорт на контејнерот го ангажирал правното лице каде четвртоосомничената била управител. Таа ја изготвила комплетната документација, а третоосомничениот со товарно моторно возило требал да го пренесе контејнерот со наркотичната дрога од пристаништето во Солун до Македонија.
На 8 мај 2023 година, по предходно добиени инструкции од првоосомничениот, третоосомничениот го презел контејнерот и се упатил во магацин во близина на Солун, каде го паркирал товарното моторно возило.
„Од засега непознати лица наркотичната дрога кокаин била претоварена во комбе кое набргу потоа било запрено од страна на Директоратот за борба против дрога-Солун. Во комбето се пронајдени 104 килограми и 644 грама кокаин, а во спроведената акција во Грција од слобода се лишени седум грчки и тројца албански државјани“, пишува во соопштението.
Покрај наредбата за спроведување на истражна постапка, јавниот обвинител ценејќи дека постојат околности што го оправдуваат стравот oд опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесници ќе ја попречат истрагата, како и стравот ако се бранат од слобода дека ќе го повторат делото, вчеравечер до судијата на претходна постапка при Основниот кривичен суд Скопје достави предлог за определување на мерка притвор за осомничените. Судијата на претходна постапка делумно го прифати предлогот на обвинителството и на двајца осомничени со Решение им определи мерка притвор во траење од 30 дена, додека на двајца осомничени им определи мерка куќен притвор.
