Како што соопшти Министерството за култура, Костадиновска-Стојчевска истакнала дека чинот на воспоставување дипломатски односи меѓу двете земји „отвори ново поглавје во нашето пријателство, заемно почитување и искрена поддршка која ја добиваме од денот на нашата независност“.
„Обединетото Кралство, како постојан член на Советот за безбедност, драгоцен поддржувач на нашиот прием во Обединетите нации, вложи искрени напори во надминување на спорот со соседна Грција и беше силен поборник за нашиот кандидатски статус во Европската Унија. Тоа и се случи. Статусот го добивме во 2005 година, за време на британското претседавање со Унијата. Во Лондон, практично, станавме и 30-тата членка на НАТО“, рече Костадиновска-Стојчевска.
Посочи дека во изминатите 30 години се остварени голем број соработки во сите области, а дека Лондон, „како моќен светски политички и економски центар“, е предизвик и за соработка во културата.
„Да се освои и да се остави трага во него, е повеќе од престиж. Оттаму, нема да ја сокријам амбицијата дека сакаме да ја продолжиме и зајакнеме соработката во културата и уметноста, да ги исползуваме можностите од Спогодбата за соработка и во областа на културата, спогодба која е во сила од пред две децении, како и ползата од бројните билатерални договори за соработка во културата. Британската публика, позната по својот истенчен и пребирлив вкус за уметноста, со забележлив интерес ја проследи поставката на Археолошкиот музеј на изложбата „Религиите во големите империи“ во музејот Ашмолеан во Оксфорд“, истакна министерката за култура.
Потсети дека македонската современа ликовна сцена беше претставена на изложбата „ Made in Macedonia“ во Лондон. На фестивалот „Globe to Globe“ настапи Народниот театар од Битола со „Хенри VI“ на македонски јазик, а организаторите го оценија како еден од најдобрите на фестивалот. На Катедрата за славистика на престижниот Универзитетски колеџ во Лондон, пак, беше промовирана и едицијата „130 тома македонска книжевност“ преведена на англиски јазик.
Додаде и дека во лондонските престижни концертни сали, настапите на пијанистот Симон Трпчески секогаш се наградени со долготраен аплауз.
„Земјата на Шекспир беше дом и на нашиот модерен Шекспир, Горан Стефановски. Тој, и оваа вечер би ја направил посебна. Но, Северна Македонија во изминатите години со задоволство беше домаќин и на бројни британски уметници на ликовната колонија во Галичник, Скопскиот џез фестивал, во Националната филхармонија, на Охридско лето, на Струшките вечери на поезијата“, рече Костадиновска-Стојчевска.
Како што наведува Министерството за култура во соопштението, таа го истака и значењето на преводите на делата кои од англиски јазик, преку Министерството за култура, се поддржуваат и се достапни на македонски, како и соработката во кинематографијата преку Агенцијата за филм.
„Министерката за култура Костадиновска-Стојчевска зборуваше за големиот број македонски иселеници и студенти кои престојуваат во Обединетото Кралство и додаде: „На наше големо задоволство, на една од најпрестижните образовни институции во Обединетото Кралство, каде се изучуваат словенски јазици – Универзитетскиот Колеџ во Лондон, по пауза од 18 години, од 2019 година повторно се изучува македонскиот јазик. Им изразувам благодарност на сите кои работеа и успеаја во овој предизвик, особено на тогашните наши дипломати во амбасадата во Лондон. На оние кои ја посетуваат наставата им посакувам со лесно да го научат убавиот македонски јазик“, информира Министерството.
На свечената вечер за билатералните односи со Обединетото Кралство, гостите ги поздрави и специјалниот пратеник за Западен Балкан на британскиот премиер, Лорд Пич, кој е одличен познавач на состојбите во земјава и во регионот.
„Во изминативе 30 години, исто така ве поддржуваме и во сериозните активности, како што е приклучувањето на земјата во НАТО. Имав огромна привилегија да бидам присутен и на тој чин на приклучување во НАТО во 2020 година. Тој е ден којшто никогаш нема да го заборавам. Значи, станува збор за една многу сериозна релација помеѓу нашите земји, којашто постојано се развива, меѓу кои се трговската размена и постојаното зајакнување на соработката во делот на културата. Како што е, на пример, Програмата за културна размена којашто е извонредна и многу малку земји се на нивото на оваа соработка и размена што имаат нашите две земји. И ова е израз на почитта која ние ја имаме кон жителите на вашата убава земја. Јас ја имам таа првилегија често да ја посетувам вашата земја и секогаш сум импресиониран од квалитетот којшто младите луѓе го поседуваат, на нивната енергија, на ентузијазмот на работата. И секако дека вечераниот концерт ќе биде уште еден дополнителен настан на долгиот список на успешна соработка и големи успеси“, рече Лорд Пич во своето обраќање.
Вечерта продолжи со концертот на пијанистот Дино Имерии со хрватскиот наградуван пијанист Ведран Јањанин. На програмата беа дела од македонски автори, Дијана Имери-Илкоска, како и дела од Густав Холст, Сергеј Рахмањинов и Витолд Лутославски.
„Културната програма беше заокружена во Македонската амбасада во Лондон, со изложба на 17 уметнички дела на уметницата Жанета Гелевска-Жани, создадени во последниве неколку години во оваа светска културна метропола“, информира Министерството за култура.
Во рамки на посетата на Лондон, Костадиновска – Стојчевска се сретна и со директорката на Филмскиот фестивал за жени над 50 години познат како ВОФФ, Нула О’Саливен.
„Средбата отвори прашања што ги засегаат жените во светот на филмската индустрија и беше посочена улогата што ја има овој фестивал – преку афирмацијата на повозрасните жени во филмот, да се спротивствува на поделбите и сексизмот со кои се соочуваат многу жени авторки“, соопшти Министерството за култура.
Костадиновска-Стојчевска изрази задоволство што лондонскиот фестивал ќе го прикаже во ноември и македонскиот филм „Медена земја“ со што, како што нагласи, се потенцира и моќната порака на авторите кои со ова остварување имаат посебно влијание во глобални рамки.
„Радува фактот што во македонската кинематографија многу жени започнаа сериозно да се занимаваат со оваа уметност, а дел од нив се: Марија Апчевска, Тамара Котевска, Елеонора Венинова, Дина Дума. Тие се еден вистински нов, женски бран во македонската кинематографија и тие полека, но сигурно ги освојуваат европскиот и светскиот културен простор како дел од селекцијата на многу престижни филмски фестивали“, рече Костадиновска-Стојчевска на средбата.
Таа и директорката О’Саливен разговараа и за успешната соработка во рамките на новиот филм на Тамара Котевска „Патешествието“, кој е направен во британска продукција и македонска малцинска копродукција и кој светската премиера ќе ја има во Њујорк, на најстариот и најголем фестивал посветен на документарни филмови во ноември, DOC NYC.
„Средбата беше повод да се поразговара и за идните можности за иницирање соработка на Филмскиот фестивал за жени над 50 години со македонските филмски фестивали, особено со најстариот ‘Браќа Манаки’ во Битола“ пишува во соопштението.
Костадиновска-Стојчевска и О’ Саливен разговараа и за можноста млади автори од Македонија да учествуваат на овој меѓународен фестивал со филмови во чиј фокус се жините над 50-годишна возраст.
