Новите правила требаше да стапат на сила од јули. Ова е најстрогиот закон против тутун во светот, со кој ќе се забрани продажбата на сите родени по 1 јануари 2009 година, ќе се намали содржината на никотин во тутунските производи и ќе се намали бројот на продавачи на тутун за повеќе од 90 проценти.
Новата коалициска влада избрана во октомври потврди дека во вторник ќе го укине законот по итна постапка, што ќе ѝ овозможи да ја заобиколи јавната расправа, согласно претходно најавените планови.
Помошникот министер за здравство Кејси Костело рече дека коалициската влада е посветена на намалување на пушењето, но презеде поинаков регулаторен пристап за да ја обесхрабри оваа навика и да ја намали штетата што ја предизвикува.
„Наскоро ќе донесам пакет мерки до Кабинетот за зголемување на достапните алатки за да им се помогне на луѓето да се откажат од пушењето“, рече Костело, пренесе Ројтерс.
Одлуката, жестоко критикувана поради нејзиното очигледно влијание врз здравјето во Нов Зеланд исто така предизвика критики поради стравувањата дека може да има поголемо влијание врз популацијата на Маорите и Пасифика, групи со повисоки стапки на пушење.
Укинување на законот се коси со силните докази од истражувањата, ги игнорира мерките кои силно ги поддржуваат маорските лидери и ќе ја одржи нееднаквоста во здравјето, рече истражувачката од Универзитетот Отаго Џенет Хоек.
„Големите клинички испитувања и студиите за моделирање покажуваат дека легислативата брзо ќе ги зголеми стапките на откажување од пушење кај пушачите и значително ќе им отежне на младите да почнат да пушат“, рече Хоек, ко-водителка на групата која ги истражува начините за намалување на пушењето.
