Тајванскиот брод Кинг Шија имал екипаж од 11 лица и превезувал 23 патници на разгледување околу главниот остров на островите Кинмен. Бил пресретнат од два брода на кинеската крајбрежна стража. Шест полицајци се качиле на бродот и ги пребарувале документите на патниците, а заминале по половина час, соопшти Управата на крајбрежната стража на Тајван (ЦГА). Набргу потоа, патрола на тајванската крајбрежна стража дошла и го однела бродот до пристаниште.
Островите Кинмен се на тајванска територија, но се наоѓаат на само неколку километри од кинеското копно. Изјавите на тајванските власти потврдуваат дека Кинг Шија малку скршнал од патот за да избегне гребени.
ЦГА напиша дека кинеските и тајванските туристички бродови често навлегуваат на територијата на другата земја, но дека службеници на ЦГА никогаш не се качуваат на кинески бродови, бидејќи е очигледно дека се работи за случајност. Тие побараа од кинеските власти „да се држат до мирот и рационалноста“.
Куан Би Линг, шефица на Тајванскиот совет за океански прашања, рече дека кинеската крајбрежна стража предизвикала паника. Тајванското биро за поморски работи и пристаништа ги повика тајванските бродови во иднина да ги одбијат барањата за инспекција од страна на кинеската крајбрежна стража.
Тајванскиот министер за одбрана Чиу Куо-Ченг рече дека војската нема да интервенира за да избегне понатамошна ескалација на ситуацијата. Тој повика на изнаоѓање мирно решение.
За време на минатонеделниот инцидент, четворица кинески рибари, кои ловеле риба на тајванска територија, биле бркани од тајванската крајбрежна стража, при што рибарите паднале во вода. Двајца биле спасени од тајванската крајбрежна стража, а двајца биле пронајдени во несвест на брегот. Од болницата на островите потврдија дека тие починале.
Пекинг ја обвинува тајванската владејачка Демократска напредна партија (ДПП) за смртните случаи. Тие напишаа дека инцидентот „ги повредил чувствата на жителите од двете страни на теснецот, токму во време кога ја слават Новата година“. Тие, исто така, ја зајакнаа својата крајбрежна стража со дивизијата Фуџијан која оди во редовни патроли.
Пекинг долго време го присвојува Тајван како своја територија, а под Си Џинпинг е сè порешителен во „повторното обединување“. Си не ја отфрли употребата на сила, но во обид да избегне војна, користи методи на економска принуда и психолошка војна.
