Клучниот момент на мечот во Баскија се случи рано во натпреварот, Хумелс заработи црвен картон и ја остави Рома со десет фудбалери.
Тоа го искористи Билбао кој дојде до победа и пласман во четвртфиналето. Нико Вилијамс го даде првиот и последниот гол, а погодок постигна и Берчиче, почесниот гол за Рома се случи во 92. минута кога Паредес погоди од пенал.
Лацио со предност од 2-1 го почна денешниот меч против Викторија Плзен, но Чесите во 52. минута поведоа преку Шулц и ја анулираа негативата од првиот меч.
Но, во 77. минута Ромањоли даде гол за конечни 1-1 и пласман на Лацио во следното коло.
Ајнтрахт Франкфурт со 4-1 го совлада Ајакс и со вкупни 6-2 оди во четвртфиналето од Лига Европа.
Таму ќе биде и Бодо/Глимпт кој со 2-1 загуби кај Олимпијакос, но претходно на домашен терен победи со убедливи 3-0.
