На брифингот со новинарите пред годишниот самит на Алијансата, тој рече дека неодамнешните подметнати пожари, заговори за атентати и саботажи во Европа се дел од тајната кампања на рускиот претседател Владимир Путин да ја поткопа поддршката за Украина меѓу граѓаните, пренесува Ројтерс.
„Она што го гледаме денес се сè уште многу високи руски загуби. Русија се обидува да заземе нови територии, додека украинската одбрана постигна значителен напредок“, изјави функционерот кој сакаше да остане анонимен.
„За да се одржат вистински офанзивни операции, мислиме дека Русија ќе мора да обезбеди значителни резерви на муниција од земји надвор од она што веќе го добива од Иран и Северна Кореја“, продолжи официјалниот претставник. „Владимир Путин тогаш би морал да нареди нова мобилизација од големи размери“.
Западните и украинските официјални лица велат дека Иран ѝ доставува на Русија самоубиствени беспилотни летала, што Техеран го демантираше, и дека Северна Кореја ѝ обезбедила на Москва артилериски гранати и ракети. Двете земји негираат дека имало такви трансфери.
Официјален претставник на НАТО процени дека Русија ќе може да ја одржи својата воена економија уште три или четири години.
Украинските сили се во дефанзива на бојното поле со месеци, додека руските војници континуирано вршат офанзивен притисок и бавно напредуваат во источна Украина.
Официјален претставник на Алијансата рече дека „ќе биде потребно извесно време“ за Украина да складира муниција и војници што ѝ се потребни за нови, големи офанзивни операции.
„Гледаме дека тоа се подобрува од ден на ден“, додаде тој.
Тој рече дека НАТО објави две соопштенија за да ја предупреди Москва дека знае за нејзината тајна кампања за поткопување на европската поддршка за Украина.
Алијансата, исто така, значително го зголеми споделувањето на разузнавачки информации меѓу своите членови, така што „имаме заедничка слика за тоа што се случува“, рече функционерот.
Тој исто така изјави дека Кина продолжува да испраќа „критични делови“ за дронови, ракети и руската воена индустрија.
Официјалниот претставник на НАТО изјави дека Путин „сè уште мисли дека времето е на негова страна“ и дека е подготвен да преземе „навистина неверојатен број воени жртви“.
Тој тврди дека Русија регрутира околу 30.000 војници месечно, што ѝ овозможува да претрпи големи загуби на бојното поле.
