Театар „Чекори“ во рамки на младинскиот дел од Фестиалот ДОПС, ја изведоа претставата „Драги уметници“ во режија на Маја Ѓурчевска. Претставата е комедија по дело на писателот Леонид Зорин од Азербејџан. Улогите ги толкуваат Марко Џамбазоски, Даниел Гочевски, Никола Кузманоски, Тамара Стојаноска, а тон и светло мајстор е Никола Димевски.
Жирито во состав Лилјана Степановиќ – драмска уметничка од Белград, Велимир Митровиќ – режисер од Белград и д-р Снежана Марковиќ, претставник на градот Јагодина како домаќин, за претставата на аматерскиот театар „Чекори“ искажаа многу пофални зборови и оценија дека е во рангот на високо професионален театар. Тие оценија дека станува збор за добро осмислена комедија со одлична глума и компактна комуникација на актерите со која до израз доаѓа колективната глума, која и покрај тоа што е изведена на македонски јазик, беше разбирлива и ја насмеа публиката.
Претставата „Драги уметници“ пред Јагодина беше изведена и наградена на уште неколку други театарски фестивали, меѓу кои и во Требиње (БиХ) на меѓународниот „Фестивал на фестивалите“.
П.Џ.
