сабота, 20 јули 2024
Мандатарот во името на коалицијата на ВМРО-ДПМНЕ

Мицкоски: Струјата за поштедливите домаќинства нема да се зголеми, за другите само до 2 проценти

Граѓаните кои со сметките се во првата и втората потрошувачка група нема да добијат повисоки суми за потрошената струја, а за останатите сметките нема да бидат повисоки од 2 отсто, изјави денеска во Собранието на Македонија лидерот на ВМРО-ДПМНЕ, пратеник и мандатар за состав на владата, Христијан Мицкоски. Тој најави од јануари намалување на цената на струјата. Мицкоски со група пратеници денеска во Собранието достави предлог закон за дополнување на Законот за енергетика по скратена постапка, со кој нема да има зголемување на цената на електричната енергија за домаќинствата, се очекува од идната година да се намали цената на струјата,

Објавено на

часот

Сподели

„Како идна влада не сакаме да се мешаме во работата на независните регулаторни тела, но исто така како идна влада имаме одговорност. За време на кампањата  ветивме дека граѓаните и нивниот стандард ќе бидат наш приоритет и дека како влада имаме намера серизно да се грижиме за нивниот стандард и да не дозволиме истиот поради ситни интереси на поединци да биде начнат, односно загрозен. Затоа, доставивме предлог закон за дополнување на Законот за енергетика по скратена постапка, со кој нема да има зголемување на цената на електричната енергија за домаќинствата, односно стандардот на граѓаните ќе биде заштитен и нема да се дозволи драматично зголемување на цената на електричната енергија“, рече Мицкоски.

Тој појасни дека со овие измени домаќинствата кои се во првата и втората група нема да добијат зголемени сметки за струја, а очекува да нема значително зголемување и за потрошувачите во третата и четвртата група, односно тоа би се движело  од 1 до 2 проценти.

Со поднесениот предлог закон, како што рече, ќе се спречи зголемување на цената на струјата од 5 проценти почнувајќи од 1 јули, согласно одлуката донесена деновиве од техничката Влада.

Мицкоски појасни дека цената на електричната енегрија се формира како збир од четири собирока: цената за услугите на МЕПСО, на ЕВН дистрибуција, на операторот на пазари МЕМО и цената на електрична енергија од ЕСМ (поранешно ЕЛЕМ), а која со одлуката на техничката влада треба да се зголеми за 5 проценти, односно од 57 на 60 евра за киловатчас.

„Сите овие четири собирока на крај се множеа со коефициентот 1,115, односно старата маржа која универзалниот санбдувач ја наплаќаше од домаќинствата или 11,5 проценти. Откако истече лиценцата со старата маржа за стариот универзален снабдувач се распиша нов јавен опглас и најповолната понуда ја намали таа маржа од 11,5 на 9,9 проценти. Со  дополнување на законот за енергетика всушност велиме дека не е потребно бидејќи станува збор за исто правно лице повторно формирање на ново правно лице, нова структура нови трошоци за банкарски сметки нови процедури,  нешто што ќе трае со месеци, туку велиме дека бидејќи станува збор за старо нов бидејќи истиот кој што и порано бил универзален снабдувач како правно лице ќе продолжи да биде универзален снабдувач како правно лице и во иднина, нема потреба да регистрира ново правно лице, бидејќи станува збор за истото, само му ја продолжува Регулаторната комисија, по основ на овој предлог закон кој што ние го доставуваме за дополнување на Законот за енергетика важноста на лиценцата. Тоа значи дека наместо маржа од 11,5 проценти која што до сега им беше наплаќана на граѓаните, ќе биде наплаќана маржа од 9,9 проценти“, објасни детално Мицкоски.

Тој воедно упати порака до универзалниот снабдувач да врши, како што вели, многу внимателно оптимизација на своите потреби односно при набавката на електричната енергија да се води најпрво од интересите на граѓаните, да не набавува количини на електрична енергија кои што нема да бидат потребни, односно да направи оптимизација за својата набавка на електрична енергија.

„Доколку овие две работи се случат, односно овој Закон за дополнување на законот за енергетика се донесе, ќе биде намалена маржата од 11,5 проценти на 9,9 проценти и доколку универзалниот снабдувач направи оптимизација на своето портфолио, односно оптимизација на количините на електрична енергија, тогаш јас ве уверувам дека граѓаните нема да добијат повисоки сметки за електрична енергија“, уверува Мицкоски.

Тој најави дека ќе преземат активости во следите шест месеци да го реорганизираат енергетскиот сектор и веќе во следниот регулационен период од 1 јануари 2025 до 30 јуни 2025 година граѓаните да добијат поевтини сметки за електрична енергија, а исто така и индустријата која што е на регулираниот пазар.

„На тој начин инфлацијата ќе биде задушена, односно цените наместо да се качуваат, ќе се намалуваат, граѓаните се нашиот приоритет и како идна влада имаме намера да ни  бидат исклучиво важни граѓаните. Граѓаните направија тоа што требаше да направат сега, идната влада предводена од ВМРО-ДПМНЕ треба да направи за граѓаните“, рече мандатарот Мицкоски.

ТОП ВЕСТИ

ПОСЛЕДНИ ВЕСТИ