Медиумите во Грција, како што е пракса во изминатиот период, акцентот го ставаат на (не)употребата на уставното име, па така, овој пат, како што јавува МИА од Атина, текстовите во онлајн изданијата се под насловите: „Северна Македонија: Христијан Мицкоски инсистира на терминот Македонија – за викендот новата Влада“; „Само во контактите со странските лидери, Мицкоски ќе го користи Северна Македонија“; „Мицкоски: Усно Македонија, писмено Северна Македонија“; „Мицкоски: Во странство ќе го користам уставното име, дома само Македонија“; „Скопје: Мицкоски ја продолжува играта околу името на земјата“.
Поголемиот број од порталите го објавуваат текстот на грчката агенција АНА-МПА во кој е пренесена изјавата на Мицкоски во синоќешното интервју за ТВ Сител, па медиумите пишуваат:
„Истото име ќе го користи и во контактите во странство со странските лидери, како што рече. Но, во внатрешноста на земјата, како во јавните настапи, така и во изјавите ќе го користи името ‘Македонија’, бидејќи, како што самиот рече, името на неговата земја и татковина е ‘Македонија’, пишува грчката државна агенција.
Паралелно, грчката новинската агенција во посебен текст се осврнува и на писмото на Мицкоски до претседателот на Собранието, во кое, како што пишува, „го користи уставното име на земјата“, пренесувајќи ја целата содржина, што исто така е објавено и во останатите медиуми во земјата.