АП информира дека се пријавени десетици инциденти во мавровскиот регион каде од своите планински живеалишта мечки се симнуваат во селата и дури влегуваат во објекти барајќи храна, што внесе страв кај населението принувајќи ја Владата да преземе мерки.
Ангелов за АП вели дека популацијата на мечки само во Националниот парк Маврово во последниве години пораснала од 70 на 160 до 180 мечки.
Според директорот на ЦУК, поради климатските промени мечките почнале да не спијат во зима и, што до скоро било реткост, сега да имаат и по три младенчиња. Тие се постојано во потрага по храна, вели Стојанче Ангелов.
Инаку, станува збор за кафеавата мечка која уште од 1996 година е заштитена со закон. Наместо барањето за отстрел од страна на локалното население, Владата деновиве донесе одлука да се исчистат ѓубриштата и дивите депониите во и околу мавровските населени места бидејќи тие ја привлекуваат мечката. Контејнерите за ѓубре ќе мора да бидат прописно обезбедени. Освен тоа треба да се заштитат местата каде се чува храна, како и пчелните семејства, а при потреба да се користат стандардни средства за заплашување и одвраќање на мечките.