Како што соопшти МНР, Муцунски му посака добредојде и успешна работа на амбасадорот Буршаков, прв резидентен амбасадор на Република Казахстан во земјава.
„Соговорниците искажаа заемно задоволство од успешниот развој на односите меѓу двете држави, со очекување дека новоотворената амбасада на Република Казахстан во Скопје ќе придонесе за натамошно продлабочување на економската соработка, бизнис врски и зголемување на трговската размена меѓу двете земји“, стои во соопштението.
Воедно, се додава, министерот го запозна амбасадорот со проектите и приоритетите на новата Влада, ставајќи акцент на нашиот евроинтегративен процес, а беа разменети и мислења за значајни надворешно-политички теми.
