Според Централната изборна комисија, Георѓеску освоил околу 22 отсто од гласовите, додека Чиолаку околу 20 отсто. Сепак, само половина од гласовите на Романците од дијаспората се изброени. Конечниот резултат се очекува во текот на денот.
Резултатот за многумина е повеќе од изненадувачки. Анкетите не предвидуваа дека десничарскиот политичар Георѓеску воопшто ќе влезе во вториот круг од изборите. Тој е познат по своите силно религиозни и националистички ставови. Против него беше покрената кривична постапка во 2022 година за величење на одговорните за холокаустот. Тој ги застапува проруските позиции и критички се изјаснува за членството на Романија во НАТО.
Иако во голема мера беше игнориран од неговите политички противници и традиционалните медиуми, Георѓеску постигна голем успех на социјалната мрежа Тикток.
Коментаторите во Букурешт во неделата вечерта истакнаа дека традиционалните медиуми и етаблираните политичари сносат одговорност што не ѝ обрнувале доволно внимание на неговата политичка пропаганда на социјалните мрежи. Ниту анкетарите не го предвидуваа неговиот успех, а ниту излезните анкети за време на изборната ноќ не укажуваа на таков резултат.
За време на изборната ноќ, Георѓеску на прес-конференција емитувана на Фејсбук рече дека романскиот народ „се вразумил“ и ја покажал својата волја „повеќе да не биде на колена, под инвазија, понижен“. Според него, причината за ова гласање е економската неизвесност.
„Вечерва романскиот народ извика „мир“, додаде Георѓеску, алудирајќи на руската војна против соседна Украина.
Романија, која се наоѓа на крајниот исток на Европската Унија, има околу 19 милиони жители и се смета за една од најсиромашните земји во Европа. На север се граничи со Украина, која речиси три години се брани од руската инвазија.
Ако Георѓеску победи на вториот круг на 8 декември, тоа би можело да ја промени надворешната политика на Романија, која досега беше строго усогласена со ЕУ и НАТО.
Во Романија претседателот одлучува за надворешната и одбранбената политика и има контрола над разузнавачките служби. Неговите овластувања се поголеми од оние на германскиот претседател, но помали од оние на францускиот претседател.
Кандидатот Ѓорѓе Симон, кој испадна од претседателската трка откако освои 14 отсто од гласовите, најави дека ќе го поддржи Ѓорѓеску во вториот круг. Симон е член на десничарската екстремистичка парламентарна партија АУР.
Третото место го зазеде Елена Ласкони, кандидатка на конзервативно-либералната Реформистичка партија, со нешто помалку од 19 отсто од гласовите. Засега таа јавно не се изјаснила за ниту еден од преостанатите кандидати.
Оваа ситуација не е сосема нова за Романија: слична ситуација се случи на претседателските избори во 2000 година. Потоа, во вториот круг, се соочија социјалдемократот Јон Илиеску и десничарскиот екстремист Корнелиу Вадим Тудор. Демократските партии потоа ги здружија силите и со значителна поддршка од европските сојузници успеаја да спречат доаѓање на екстремист на највисоката државна функција.
