Неколку „воени цели“ се погодени во западниот пристанишен град Ходејда, наведе израелската војска, додавајќи дека нападот е „одговор на стотиците напади извршени на државата Израел во последните месеци“.
Портпаролот на Хутите Мохамед Абдулсалам на социјалната мрежа Икс порача дека Јемен е подложен на „очигледна израелска агресија“ насочена против резервоари со гориво и електроцентрала.
Тој кажа дека нападот има за цел „да го засили патењето на народот и да се изврши притисок врз Јемен да престане да ја поддржува Газа“. Абдулсалам порача дека нападите само ќе го направат народот на Јемен и неговите оружени сили порешителни да ја поддржат Газа.
Медиум под контрола на Хутите во Јемен јави претходно денес дека врз пристанишниот град Ходејда се извршени интензивни воздушни напади и дека веројатно Израел стои зад нив.
Телевизијата Ал масира објави дека во нападите на резервоарите со гориво во пристаништето и врз локалната електроцентрала има загинати и ранети, но не изнесе други детали. Во извештајот се наведува дека во пристаништето избил голем пожар и дека голем број потрошувачи останале без електрична енергија.
Здравствените власти во Јемен соопштија дека во нападите загинале повеќе луѓе и дека многумина се повредени, но не изнесоа детали.
Во нападот на Хутите со дрон во центарот на Тел Авив загина едно, а ранети се најмалку десет лица.