ГРАЃАНИ, кои обично гракнуваат во хор, но врескаат и издвоено, ако затреба, и тоа во облик на трибуни, активисти, новинари, интелектуалци, експерти…
ШЉУПКОВ
ОБЛАЦИ, ПОЛЖАВИ, СВИЊИ
ГРАЃАНСКИ ТРИБУН: Кој го уби граѓаниниот Пикајноски?
Штама
ГРАЃАНСКИ АКТИВИСТ: Шљупков! Шљупков го уби Пикајноски!
(Колебање. Трибунот и активистот се ѕверат во толпата, по што неколку активисти поземаат)
АКТИВИСТИЧКИ ХОР: Шљупков! Шљупков!
НОВИНАР: Шљупков има шарена ласица која блуе оган!
ИНТЕЛЕКТУАЛЕЦ: Ова, да… така е браќа граѓани! Мораме повторно да го воспоставиме граѓанскиот поредок! А во него нема место за шарени ласици кои блујат оган!
АКТИВИСТ: (му се врекнува заканувачки): Абе тикво, овде на Шљупков му се суди, не на некакви ласици! Или можеби си реакционер, а?! (Интелектуалецот испарува во чад и го снемува)
ПРАВЕН ЕКСПЕРТ: Казна за виновникот!
(Општа акламација. Го убиваат Шљупков)
Повторно штама… По некое време:
ГРАЃАНСКИ ТРИБУН: Кој го уби граѓанинот Шљупков?
Штама
ГРАЃАНСКИ АКТИВИСТ: Облаците! Облаците го убија Шљупков!
Колебање. Неколку активисти поземаат
АКТИВИСТИЧКИ ХОР: Облаците! Облаците!
НОВИНАР: Облаците јадат гурабии и блујат мастило од небото!
ИНТЕЛЕКТУАЛЕЦ (отсутно си го чеша носот со монета. Еден граѓански активист го буцнува по ребрата. Жално): Ама што па сега јас?
(Активистот му тутнува уште една монета)
ИНТЕЛЕКТУАЛЕЦ: Ова, да… во граѓанскиот поредок нема место за гурабии, мастило и небо!
(Активистите го изнесуваат интелектуалецот од сцената и на негово место донесуваат кукла на надувување)
ПРАВЕН ЕКСПЕРТ: Казна за виновникот!
Општа акламација. Трчаат по облаците. Како што трчаат по облаците, еден граѓанин се препнува во еден ендек и умира. Штама.
ГРАЃАНСКИ ТРИБУН: Кој го уби граѓанинот Трчилажев?
ГРАЃАНСКИ АКТИВИСТ: Полжавите! Полжавите го убија граѓанинот Трчилажев!
(активистичкиот хор се надоврзува)
НОВИНАР: Полжавите организираат трки со мотори и крадат кокошки од Баба Јага!
(Ја надувуваат куклата и ја пукнуваат)
ПРАВЕН ЕКСПЕРТ: Казна за виновникот!
АКТИВИСТИЧКИ ХОР: Во ресторан! Во ресторан! Да гнетеме полжави!
СИТЕ (орно): Да живее демократијата!
Трчаат.
Еден граѓанин останува сам на сцената. Штама. Одеднаш се обѕрнува околу себе.
ГРАЃАНИН: Кој ги уби граѓаните?
Штама
ГРАЃАНИН: Свињите! Свињите ги убија граѓаните! Свињите… свињите… (Пауза. Беспомошно си ја чеша главата) …јадат демократија и практикуваат трици! Казна за виновникот! (Трча со стиснати тупаници кон најблиската кебапчилница. Завеса)
Рајко Пеколски