1.
Лани, сите анкети покажаа дека најголема полтичка сила во Македонија се НЕЗАДОВОЛНИТЕ ГРАЃАНИ. Додека партиите се радуваат на доверие од 15 до 20 % од граѓаните, над 50% од граѓаните не му веруваат на ниту еден политичар, ниту пак на некоја партија. Замислете каква сила е тоа, ако се појават на избори.
2.
Мицкоски ќе биде идниот премиер на Македонија. Тој и неговиот тим треба да се запрашаат со каков легитимитет ќе владеат со државата, доколку во нив веруваат 13% или 20% од граѓаните.
Сепак имаат време до изборите да ја променат матрицата која не дава резултати и пред граѓаните да излезат со конкретни ставови. Граѓаните сакаат да слушнат „…ќе го направам ова и ова, на следниот начин, чини толу пари, за толку време….“. Во спротивно, ќе го немаат комфорот на владеење во стилот на СДСМ.
3.
Осумнаесет годишен матурант, во емисијата Зевзекманија, им одржа лекција и предавање на нашите политичари. Со еден збор им порача, „стоп, застанете, ни ја убивате сегашноста, ни ја убивате иднината, ако продолжите вака и државата ќе ја снема“. А, тој заминува за Словенија.
Толку верува дека неговата порака некој ќе ја слушне.
4.
Грците се откажале од Чебрен и Галиште. Сега ниту еден политичар не смее да помисли ова природно богатство да го понуди на која било странска компанија. И малите деца знаат дека на годишно ниво во Македонија се крадат околу 1 милјарда државни пари. Тоа се доволно пари за да се заврши овој капитален објект и да остане во сосптвеност на државата.
5.
Една од ретките добри работи што се случија во 2023 година, е Иницијативата за прогласување на планината Кожуф за национален парк. Оваа магична планина конечно ќе биде заштитена и зачувана за идните генерации. Кавадарци, Демир Капија и Гевгелија донесоа историска одлука планината Кожуф да влезе на светската карта на подрачја со посебна важност. Браво.
Ангел Наков