„Искрен да бидам, за ваквата нивна одлука дознав од медиумите. Не сум бил известен ниту јас, ниту пак до ЗЕЛС има стасано било каков допис од двајцата градоначалници. Сметам дека обвинувањата на колегата Костадинов се несериозни, бидејќи до сега не сме дозволувале политиката, а особено дневната политика да се меша во работата на ЗЕЛС и секогаш сме пристапувале да се водиме од интересите на граѓаните. Жал ми е што од страна на двајцата мои колеги досега не сме биле известени за некаков проблем со било кој од централната власт за да можеме да делуваме и да помогнеме во процесот, ако имало реален проблем. И понатаму вратите на ЗЕЛС им се отворени за да седнеме и да најдеме решение за проблемите, ако навистина ги има“, вели Ѓорѓиевски.
Тој додава дека една општина може да истапи од ЗЕЛС со одлука на совет, е не единствено по волја на градоначалникот.
„Ако на одреден градоначалник не му се допаѓа еден министер, не значи дека треба да се компромитира ЗЕЛС, а тоа во моментов го прават двајцата градоначалници. Верувам дека ќе надвладее разумот кај двајцата колеги, бидејќи ЗЕЛС не е само членство, туку има и обврски, а и услуги кои ги дава во корист на општините и граѓаните. Мојот став е дека не треба заради сневна политика некој да ги доведе граѓаните во заложништво“, појаснува Ѓорѓиевски.
Претседателот на ЗЕЛС утрово телефонски разговарал со градоначалникот на општина Карпош, Јакимовски кој не дал конкретен одговор во кој дел ЗЕЛС не постапило соодветно заштитувајќи ја општината, ниту дали има проблем во однос на функционирањето на ЗЕЛС. Појаснувањата од Јакимовски зошто сака да го напушти ЗЕЛС биле дека имал одредени несогласувања со централната власт, а за овие несогласувања, претседателот Ѓорѓиевски смета дека воопшто не се поврзани со Заедницата.
Јакимовски не дал прецизен став дали дефинитивно одлучил да замине од Заедницата и договориле средба со претседателот за решавање на овој проблем. Не треба да се дознаваат работите преку медиуми и социјални мрежи, туку тие, ако постојат, се решаваат на маса.
„Не се сложувам дека партиски забави се прават во ЗЕЛС, бидејќи имам потпретседател од редовите на СДСМ, Перо Костадинов, градоначалникот на Валандово со кого имам одлична соработка. Или другиот потпретседател Ганиу, кој беше во ДУИ, а сега е во Влен… Од сите политички партии имаме членови на Управен одбор“, дециден е Ѓорѓиевски коментирајќи ја изјавата на Јакимовски дека во ЗЕЛС се прават партиски забави.
Со градоначалникот на Струмица, Ѓорѓиевски не успеал да поразговара бидејќи го побарал телефонски, но не го добил. И до него испрати апел дека треба да поразговараат на маса и да видат за какви проблеми се работи и заедно да најдат решение.
За тоа дали ЗЕЛС или општините ќе изгубат повеќе ако решат да заминат, првиот човек на Заедницата вели дека губат и едните и другите.
„Се надевам дека ќе се вразумат и дека ќе размислат добро двајцата колеги за ваквиот став. Ако останат на тој став, мислам дека тоа не е добро ниту за ЗЕЛС, ниту за општините. Градоначалник е менлива функција, а не е добро поради политика некој да повлече ваков чекор со кој губат граѓаните. Секогаш сум поборник да се вклучи разумот на највисоко ниво и да се донесат корисни одлуки“, изјави Ѓорѓиевски.
За тоа дали Арсовска ќе одговори позитивно на повикот на Јакимовски да излезе од ЗЕЛС, Ѓорѓиевски вели дека таа досега не се појавила на ниту една седница на ЗЕЛС.
„Арсовска не учествува во финансирање на ЗЕЛС, откако беше сменета од местото претседател на Управен одбор на ЗЕЛС. Практично, како и за многу други работи поврзани со неа, така и за ова не гледам многу вклученост и посветеност и овде. Еднаш се појави на Генерално собрание пред неколку месеци. Секоја општина спрема бројот на жители учествува со одредена сума во ЗЕЛС. Ако и Арсовска одлучи да си замине од ЗЕЛС тогаш тоа ќе значи дека се работи за одредена синхронизирана активност организирана од некој. За дневна политика да доведувате одредени општини да истапуваат од асоцијација која е многу порано формирана од нашето стапување на финкција, мислам дека ќе даде друга димензија во процесот односно ќе остави простор да се сомневаме дека ова има некоја друга цел и има организатор на ова“, додава Ѓорѓиевски.
Општина Струмица и скопската општина Карпош ќе ја напуштат Заедницата на единцата на локална самоуправа (ЗЕЛС). Градоначалникот на Струмица, Костадин Костадинов вели ЗЕЛС не заслужува градот со кој раководи тој да партиципира во оваа Заедница. Јакимовски пак синоќа најави дека ќе му се придружи на Костадинов.
Излегувањето од ЗЕЛС градоначалникот на Струмица, Костадин Костадинов го најави во објава на фејсбук каде наведе дека ќе подготви и официјален допис до ЗЕЛС. Причина за ваквата негова одлука е, како што напиша тој, е притисокот што централната власт го врши врз Институтот за јавно здравје и министерот за земоделство за проблемот за водата за пиење што во Струмица се провелува веќе повеќе од еден месец.
И градоначалникот на скопската општина Карпош, Стевчо Јакимовски, вчеравечер во гостување во поткаст најави дека ќе го напушти ЗЕЛС.
„И јас ќе се придружам на Општина Струмица. И така одамна се спремам да ја напуштиме ЗЕЛС. Нека си прават таму партиска забава“, изјави Јакимовски.
Посочи дека истото треба да го направи и градоначалничката на Градот Скопје, Данела Арсовска, оти градот е главен финасиер на ЗЕЛС, а за возврат не добива ништо.
К. Додевска
