Се работи за уникатен концепт на атлетска трка која е вистински тест за физичката подготовка и менталната цврстина на натпреварувачите, дел од нив трчаа и повеќе од 100 километри.
Учесниците трчаат кругови. Кругот е во должина од 6,7 километри и предвидено е да се заврши за 42 до 46 минути. Преостанатото време до еден час е предвидено за одмор. На секој час почнува нов круг. Победник е оној кој последен ќе се откаже.
Трката почна во сабота од 10 часот, а траеше до длабоко во ноќта. Најдобар беше Жикица Ивановски кој истрча 18 кругови, односно должина од 120 километри.
Најдобра меѓу дамите и втора меѓу сите натпреварувачи беше Радмила Јованова која истрча 17 кругови односно 114 километри.
Влатко Семенаков, Алек Апостоловски, Ивана Ценериќ и Катерина Шиповиќ истрчаа по 16 кругови.
На трката беа пријавени повеќе од 60 натпреварувачи. Покрај ултрамаратонците од Македонија, имаше пријавено учесници и од Србија, Словачка, Грција, Косово, Украина и Полска.