Организаторите на Изборот за песна на Евровизија го одбија барањето на украинскиот претседател Владимир Зеленски за видеообраќање пред финалето в сабота. Според соопштението цитирано од британските медиуми, Европската радиодифузна унија (ЕБУ) не сака да го политизира настанот.
Украинскиот лидер се надеваше дека ќе ѝ се обрати на публиката, која се проценува на 160 милиони, за да апелира за поддршка во конфликтот со Русија.
Барањето на Зеленски, „иако е упатено со намери за пофалба, за жал не може да биде уважено бидејќи би било спротивно на правилата на настанот“, се вели во соопштението на ЕБУ. Тие додадоа дека натпреварот е „контролиран од строги правила и принципи, кои се воспоставени од неговото создавање“, а еден од најважните е „неполитичката природа на настанот“.
ЕБУ е сојуз на повеќе од 100 радиодифузери што го одржуваат годишниот музички натпревар. Традиционално, домаќин е земјата што победила на натпреварот од претходната година. Украинскиот оркестар Калуш победи на настанот во 2022 година, кој се одржа во Италија, но Киев не можеше да ја преземе должноста домаќин поради конфликтот, па организацијата ѝ припадна на Британија како второпласирана.
Би-би-си и ЕБУ решија „да ја рефлектираат и прослават евровизиската победа на Украина и да покажат дека сме обединети со музиката во овие тешки времиња“, со претставување на секој уметник-учесник со „видеоразгледница“ од 37 локации од целата земја.
