Москва се сврте кон руската мафија во странство поради воведувањето меѓународни санкции поради војната во Украина и поради повлекувањето на Русија од глобалниот финансиски систем, пишува Економист.
Експертот за меѓународен криминал и разузнавање Марк Галеоти за Економист изјави дека Кремљ ги зајакнал своите врски со организираниот криминал, кој порано ретко го користел.
Тој тврди дека Москва им наредила на претставниците на мафијата дел од приходите да префрлат на „црни сметки“ за да ги финансираат активностите на руските шпиони.
Галеоти наведува дека Русија со регрутирањето на криминалците сака да ги заобиколи санкциите.
Шефот на финската надворешна разузнавачка служба Анти Пелтари вели дека војната на Путин против Украина ѝ нанела сериозна штета на руската шпионска мрежа во странство.
„Ова е резултат на масовното протерување на шпионите што работеле под дипломатска заштита, апсењето на агентите и непријателската атмосфера во Европа“, вели Пелтари.
Западните власти тврдат дека Кремљ се обидува да ги надомести загубите во шпионската мрежа преку сајбер-шпионажа, но и со испраќање нови шпиони на Запад, кои се претставуваат како бегалци, пишува Економист. Сепак, тие не можат да бидат рамноправна замена за поранешните агенти бидејќи не се доволно обучени, немаат доволно искуство ниту извори на информации.
Пристапот до електронските компоненти се вели дека е посебен проблем за Русија. САД, ЕУ и други земји ѝ забранија на Москва да ги испорачува тие компоненти. Поради недостигот од модерна електроника, рускиот воено-индустриски комплекс не може да ја надомести загубата на опрема во Украина. Економист наведува дека тоа се однесува на тенкови и проектили.
Русија бара различни начини да ги заобиколи санкциите. На пример, во Милано минатата година беше уапсен синот на гувернерот на регионот Краснојарск Артем Ус. Властите во САД го обвинија дека преку лажна компанија купувал американска електроника за борбени авиони, паметна муниција, ракетни системи, сателити, радари и друга воена опрема.
Компанијата се наоѓала во Хамбург, Германија, а купената стока била испорачана во Русија. Меѓу оние што ја примиле стоката се и санкционираните компании Радиоавтоматика, Абтроникс и Радиоекспорт. Подоцна, компонентите испорачани на овој начин беа наоѓани во руската воена опрема запленета од Украинците на бојното поле.
Од април до ноември 2022 година, со помош на вакви шеми и на мали компании од руските „пријателски“ земји, цената на увозот на полупроводници во Русија достигна 2,6 милијарди долари, пишува Економист.
