Овој коментар сенаторот од Охајо го даде на Конференцијата на американските конзервативци. Оваа ситуација може да биде крајно непријатна за британскиот министер за надворешни работи Дејвид Лами, кој се обиде да „изгради мостови“ со Венс во последните месеци, зборувајќи за тоа како и двајцата пораснале во сиромаштија.
„Неодамна со пријатели разговарав за една од најголемите опасности во светот, ширењето на нуклеарното оружје. Се разбира, администрацијата на Бајден не се грижи за тоа. Зборувавме за тоа која е првата вистински исламистичка земја што ќе добие нуклеарно оружје“, рече Венс минатиот четврток на конференција за националниот конзерватизам.
„Мислевме, можеби тоа е Иран, можеби Пакистан веќе на некој начин се брои, а потоа конечно решивме дека тоа можеби е Велика Британија, бидејќи лабуристите штотуку ја презедоа власта“, додаде тој, пренесува Гардијан.
Венс синоќа беше прогласен за Трампов избор за потпретседател, само еден ден откако поранешниот претседател за влакно ја избегна смртта на предизборен митинг. Венс претходно беше остар критичар на Трамп и ја осудуваше неговата реторика кон муслиманите.
„Трамп ги плаши луѓето за кои се грижам. Имигрантите, муслиманите итн. Мислам дека тоа треба да се осуди. Бог сака подобро од нас“, напиша Венс во октомври 2016 година. Сепак, по некое време стана еден од најистакнатите млади конзервативци на новата десница која го поддржува Трамп.
Венс е жесток критичар на поддршката на Вашингтон за Украина и неговото назначување најверојатно ќе биде дочекано со трепет во Брисел. Венс одигра важна улога во неуспешниот обид да се блокира нацрт-законот за поголема украинска помош во Сенатот оваа година.
